O‘zPFL legioner futbolchilar to‘lovini klublar uchun yengillashtirishi mumkin

O‘zbekiston Professional futbol ligasi 2021-yilgi mavsumdan e’tiboran klublar tomonidan legioner futbolchilar uchun olinadigan mablag‘ miqdorini kamaytirishni rejalashtirmoqda. Bu haqda tashkilot rahbari Diyor Imomxo‘jayev o‘z Telegram kanalida ma’lum qildi.

Musobaqalar o‘tkazish reglamentiga ko‘ra har bir klub legioner futbolchini ro‘yxatdan o‘tkazganlik uchun 50 million so‘m to‘lovni amalga oshiradi. Pandemiya davrida O‘zPFL Pro liga klublariga yengillik yaratib, mazkur summani qisqartirgan hamda to‘lov 25 milliongacha kamaygandi. Tashkilot Pro liga klublari uchun mazkur yengillikni kelasi mavsumda ham saqlab qolishi mumkin. Qayd etish joiz, uch yil avval legioner futbolchilar uchun to‘lov 100 million so‘mni tashkil qilgan.

Shuningdek, bunga qadar har bir klub legioner futbolchi uchun alohida to‘lov qilgan. Ya’ni, legioner futbolchi mavsum o‘rtasida boshqa klubga ko‘chib o‘tsa, mazkur futbolchi uchun yana alohida to‘lov majburiyati bo‘lgan. Imomxo‘jayevning so‘zlariga ko‘ra, tashkilot bu talabni ham yengillashtirishi mumkin. Bunda bir legioner uchun mavsumga bir marta to‘lov qilinadi. Legioner mavsum o‘rtasida boshqa klubga o‘tsa, u uchun yana alohida to‘lov majburiyati bo‘lmaydi.

O‘zPFL bir necha yillardan buyon O‘zbekiston klublari sharafini himoya qilayotgan legionerlar uchun to‘lov tartibini o‘zgartirishi mumkin. Bunda uzluksiz to‘rt mavsum O‘zbekiston ligalarida to‘p surayotgan legioner futbolchi kelasi mavsumlarda ham mamlakat klublari bilan shartnoma imzolasa, ularni to‘lovlardan ozod etish masalasi ko‘tarilgan. Qayd etish kerak, hozirgacha Kaxi Maxaradze (Gruziya), Dragan Cheran (Serbiya), Arslonmurod Amonov (Turkmaniston) kabi legionerlar bu yo‘lni bosib o‘tgan. Ular 2021-yilda ham O‘zbekistonda to‘p sursa, klublar bu futbolchilar uchun to‘lovlarni amalga oshirmaydi.

Qoidaga ko‘ra O‘zPFL o‘z takliflarini O‘zbekiston futbol assotsiatsiyasi bilan kelishganidan keyingina mazkur bandlar kuchga kiradi.