O‘zbekistonlik yarim himoyachi Oston O‘runovning “Spartak”dagi kelajagi mavhumligicha qolmoqda.

Foto: Twitter/@fcsm_official

20 yoshli futbolchiga “Ufa”dan qiziqish bor. Boshqirdistonliklar klubi O‘runovni ijaraga olishga tayyor, biroq “Ufa” futbolchining maoshini (yiliga 600 ming yevro) “Spartak” to‘lashini xohlamoqda, deya xabar qilmoqda jurnalist Ivan Karpov. Biroq moskvaliklar bu taklifni rad etgan.

Ta’kidlanishicha, “Spartak” legionerlar uchun ajratilgan limitni “band” qilib turgan Ostondan qutilmoqchi. Biroq Moskva klubida futbolchi borasida aytarli taklif yo‘q.

Yana bir jurnalist Sergey Yegorovga ko‘ra, “Ufa” O‘runovni 1 million yevroga xarid qilishga tayyor, biroq “Spartak” uni milliondan ko‘proq miqdor evaziga sotish istagida. Ya’ni, O‘runovni 1 millionga sotib olgan moskvaliklar hech bo‘lmaganda o‘tgan besh oy uchun maoshga sarflangan pulni (oyida 50 ming yevrodan) chiqarib olmoqchi — 250 ming yevro.

O‘runov 2020/21-yilgi mavsum “Spartak” safida Rossiya chempionatining 8 ta o‘yinida maydonga tushib, birorta ham samarali harakat amalga oshira olmadi.

O‘runov 2020-yilning yanvarida “Ufa” futbolchisiga aylangandi va 2019/20-yilgi mavsumda Rossiya Premyer Ligasida 10 o‘yinda maydonga tushib, 2 ta sariq kartochka oldi. Oston yozgi transfer oynasida “Ufa”dan 1 million yevro evaziga poytaxt klubiga o‘tdi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!