Niderlandiyalik mutaxassis Piter Hyuistra “Paxtakor” bosh murabbiyiga aylandi. Bu haqda “sherlar” matbuot xizmati ma’lum qildi.
Hyuistra o‘tgan mavsumlarda “Paxtakor”ga ustozlik qilgan Shota Arveladzega yordam berib kelagandi. Endilikda mutaxassis “Paxtakor” bosh murabbiyiga aylandi.
Eslatib o‘tamiz, 2020-yilgi mavsum yakunlangach Arveladze “Paxtakor”ni tark etishini ma’lum qilgandi.
Ma’lumot uchun, Piter Hyuistra 1967-yil 18-yanvarda Niderlandiyada tug‘ilgan. Qanot hujumchisi pozitsiyasida harakat qilgan. Futbolchilik faoliyati davomida “Groningen” (1984—1987), “Tvente” (1987—1990), “Reynjers” (1990—1995), “Sanfrechche Xirosima” (1995—1996), “Lyors” (1997—2000) hamda “Rozendal” (2000—2001) klublarida faoliyat olib borgan.
1988—1991-yillarda Niderlandiya terma jamoasida 8 ta o‘yin o‘tkazgan.
Murabbiylik faoliyatini “Groningen” klubida yoshlar jamoasini boshqarishdan (2001—2005) boshlagan. 2005—2009-yillarda “Ayaks” va “Vitess” jamoalarida yordamchi murabbiy sifatida ishlagan. Shuningdek, “Ayaks” yoshlar jamoasi, “Groningen”, “De Graafsxap” klublarida va Indoneziya terma jamoasida bosh murabbiy sifatida faoliyat olib borgan. 2017-yil iyun oyidan boshlab “Paxtakor”da yordamchi murabbiy bo‘lib ishlab kelayotgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)