Avstraliyalik olimlar hukumatdan koronavirusga qarshi emlash strategiyasini qayta ko‘rib chiqishni so‘radi, deb yozadi “RBK”. Ular AstraZeneca kompaniyasi va Oksford universiteti tomonidan ishlab chiqilgan vaksina jamoaviy immunitetni shakllantirish uchun yetarlicha samarali emasligidan xavfsiramoqda.
Olimlarning aytishicha, Avstraliya Amerikaning Pfizer va Moderna kompaniyalari yaratgan vaksinalardan qo‘shimcha buyurtma qilishi kerak. Ishlab chiqaruvchilar ma’lumotlariga ko‘ra, bu dorilar 90 foizdan ortiq samaradorlik ko‘rsatgan, ayni vaqtda AstraZeneca vaksinasining o‘rtacha samaradorligi 70 foizni tashkil etgan.
“AstraZeneca boshqa vaksinalardek foydali ekanligini ko‘rsatib beruvchi qo‘shimcha ma’lumotlarni qo‘lga kiritgunimizga qadar o‘zingizga oladigan ilmiy va tibbiy xavf shundan iboratki, siz jamoaviy immunitetga erishmaysiz. Siyosiy xavf esa siz boylar uchun yaxshi vaksina, kambag‘allar uchun — unchalik yaxshi bo‘lmagan vaksina olishingizdan iborat”, — dedi Avstraliya tibbiy assotsiatsiyasi prezidenti Endryu Miller. U AstraZeneca vaksinasi bilan boshlash rejalashtirilgan vaksinatsiyani to‘xtatib, yanada samaraliroq dorini sotib olishni taklif qildi.
Xuddi shunday fikrni yana bir avstraliyalik olim bildirdi. “Jamoaviy immunitet shakllanishi haqiqatan ham muhim, chunki aynan shu narsa virus tarqalishini to‘xtatadi va normal hayotga qaytishimizga yordam beradi. Muammo shundaki, biz AstraZeneca vaksinasiga ahamiyatli darajada umid qilyapmiz va avstraliyaliklarning mutlaq ko‘pchiligi aynan u bilan emlanadi… Ammo jamoaviy immunitet hosil qilishga qodir vaksina samaradorligi kamida 70 yoki 80 foiz bo‘lishi kerak”, — dedi yuqumli kasalliklar jamiyati eksperti, Monash nomidagi universitet ilmiy xodimi Mishel Ananda-Raja.
Hukumat olimlarning bayonotlariga javoban aholini emlash strategiyasini o‘zgartirmoqchi emasligini ma’lum qildi. “AstraZeneca vaksinasi samarali va xavfsiz”, — dedi Avstraliya bosh shifokori Pol Kelli. Uning so‘zlariga ko‘ra, hukumatning tanlovi “bittasining boshqasidan yaxshiroq” ekanligidan kelib chiqmaydi. “Bu yil AstraZeneca vaksinasi — hayotlarni qutqarish va himoya qilish uchun maksimal ko‘lamdagi vaksinatsiyani ta’minlash uchun hamyonbop variant”, — dedi bosh shifokor.
Avstraliya koronavirusga qarshi uch xil vaksinaga oldindan buyurtma berdi. Eng avval AstraZeneca’ga — 53 million doza buyurtma qildi. Bundan tashqari, Amerikaning Novavax kompaniyasi bilan 51 million doza va Pfizer bilan 10 million doza vaksina haqida kelishib oldi. Avstraliya AstraZeneca vaksinasidan foydalanishni fevraldayoq ma’qullashi kutilmoqda.
Bu dorilardan tashqari, Avstraliya hukumati koronavirusga qarshi o‘z vaksinasini ishlab chiqarishni ham rejalashtirgan edi. Ammo Kvinslend universiteti va CSL biotexnologiya kompaniyasi tomonidan ishlab chiqilgan vaksina sinovlari dekabrda to‘xtatib qo‘yildi.
Noyabr oyining oxirida AstraZeneca kompaniyasi Oksford universiteti bilan hamkorlikda ishlab chiqargan vaksinasi 70 foiz samaradorligi haqida e’lon qilgandi. Kompaniya vaksina turli emlash sxemalarida turlicha samaradorlik ko‘rsatganini bildirgan.
Xususan, odamlar vaksinaning dastlab yarimta dozasini olib, bir oydan so‘ng to‘liq dozasi bilan emlanganda 90 foiz samaradorlik ko‘rsatgan. Shu bilan birga, kamida bir oylik farq bilan to‘liq dozalarda emlangan ishtirokchilarda 62 foiz samaradorlik ko‘rsatgan. Vaksinaning ikkala sxemasi bo‘yicha umumiy samaradorlik 70 foizni tashkil etgan.
Izoh (0)