Австралиялик олимлар ҳукуматдан коронавирусга қарши эмлаш стратегиясини қайта кўриб чиқишни сўради, деб ёзади «РБК». Улар AstraZeneca компанияси ва Оксфорд университети томонидан ишлаб чиқилган вакцина жамоавий иммунитетни шакллантириш учун етарлича самарали эмаслигидан хавфсирамоқда.
Олимларнинг айтишича, Австралия Американинг Pfizer ва Moderna компаниялари яратган вакциналардан қўшимча буюртма қилиши керак. Ишлаб чиқарувчилар маълумотларига кўра, бу дорилар 90 фоиздан ортиқ самарадорлик кўрсатган, айни вақтда AstraZeneca вакцинасининг ўртача самарадорлиги 70 фоизни ташкил этган.
«AstraZeneca бошқа вакциналардек фойдали эканлигини кўрсатиб берувчи қўшимча маълумотларни қўлга киритгунимизга қадар ўзингизга оладиган илмий ва тиббий хавф шундан иборатки, сиз жамоавий иммунитетга эришмайсиз. Сиёсий хавф эса сиз бойлар учун яхши вакцина, камбағаллар учун — унчалик яхши бўлмаган вакцина олишингиздан иборат», — деди Австралия тиббий ассоциацияси президенти Эндрю Миллер. У AstraZeneca вакцинаси билан бошлаш режалаштирилган вакцинацияни тўхтатиб, янада самаралироқ дорини сотиб олишни таклиф қилди.
Худди шундай фикрни яна бир австралиялик олим билдирди. «Жамоавий иммунитет шаклланиши ҳақиқатан ҳам муҳим, чунки айнан шу нарса вирус тарқалишини тўхтатади ва нормал ҳаётга қайтишимизга ёрдам беради. Муаммо шундаки, биз AstraZeneca вакцинасига аҳамиятли даражада умид қиляпмиз ва австралияликларнинг мутлақ кўпчилиги айнан у билан эмланади… Аммо жамоавий иммунитет ҳосил қилишга қодир вакцина самарадорлиги камида 70 ёки 80 фоиз бўлиши керак», — деди юқумли касалликлар жамияти эксперти, Монаш номидаги университет илмий ходими Мишель Ананда-Ража.
Ҳукумат олимларнинг баёнотларига жавобан аҳолини эмлаш стратегиясини ўзгартирмоқчи эмаслигини маълум қилди. «AstraZeneca вакцинаси самарали ва хавфсиз», — деди Австралия бош шифокори Пол Келли. Унинг сўзларига кўра, ҳукуматнинг танлови «биттасининг бошқасидан яхшироқ» эканлигидан келиб чиқмайди. «Бу йил AstraZeneca вакцинаси — ҳаётларни қутқариш ва ҳимоя қилиш учун максимал кўламдаги вакцинацияни таъминлаш учун ҳамёнбоп вариант», — деди бош шифокор.
Австралия коронавирусга қарши уч хил вакцинага олдиндан буюртма берди. Энг аввал AstraZeneca’га — 53 миллион доза буюртма қилди. Бундан ташқари, Американинг Novavax компанияси билан 51 миллион доза ва Pfizer билан 10 миллион доза вакцина ҳақида келишиб олди. Австралия AstraZeneca вакцинасидан фойдаланишни февралдаёқ маъқуллаши кутилмоқда.
Бу дорилардан ташқари, Австралия ҳукумати коронавирусга қарши ўз вакцинасини ишлаб чиқаришни ҳам режалаштирган эди. Аммо Квинсленд университети ва CSL биотехнология компанияси томонидан ишлаб чиқилган вакцина синовлари декабрда тўхтатиб қўйилди.
Ноябрь ойининг охирида AstraZeneca компанияси Оксфорд университети билан ҳамкорликда ишлаб чиқарган вакцинаси 70 фоиз самарадорлиги ҳақида эълон қилганди. Компания вакцина турли эмлаш схемаларида турлича самарадорлик кўрсатганини билдирган.
Хусусан, одамлар вакцинанинг дастлаб яримта дозасини олиб, бир ойдан сўнг тўлиқ дозаси билан эмланганда 90 фоиз самарадорлик кўрсатган. Шу билан бирга, камида бир ойлик фарқ билан тўлиқ дозаларда эмланган иштирокчиларда 62 фоиз самарадорлик кўрсатган. Вакцинанинг иккала схемаси бўйича умумий самарадорлик 70 фоизни ташкил этган.
Изоҳ (0)