Amerikalik aktyor Chak Norris 6-yanvar kuni Vashingtonda AQShning amaldagi prezidenti Donald Tramp tarafdorlari aksiyasida qatnashganini rad etdi, deb yozadi Meduza.
“Yaqinda men Vashingtonda Kapitoliydagi tartibsizliklar chog‘ida Chak Norrisning qiyofadoshi ham bo‘lgani haqida xabar topdim. U men emasdim, men u yerda emasdim. Jamiyatimizda hech qanday turdagi zo‘ravonlikka o‘rin yo‘q. Men doim qonun va tartib tarafdori bo‘lganman va doim shunday bo‘lib qolaman. Do‘stingiz Chak Norris”, — deya post qoldirdi u Twitter’da.
Avvalroq ijtimoiy tarmoqlarda Norrisga o‘xshagan odamning fotosurati tarqalgan edi. Uni 6-yanvar kuni Vashingtonda Donald Tramp tarafdorlarining Kapitoliyga shiddatli hujum bilan tugagan aksiyasi chog‘ida suratga olishgan.
Norrisning menejeri Erik Kritser Associated Press’ga ma’lum qilishicha, aktyor hozir Texasdagi ranchosida. Kritser suratdagi odam aktyorga o‘xshashligini tan oldi, ammo uning so‘zlariga ko‘ra, “Chak undan ancha ko‘rkamroq”.
Chak Norris ko‘p yillar davomida respublikachilar tarafdori bo‘lgan va 2016-yilgi prezident saylovlarida Donald Trampni qo‘llab-quvvatlagan. 2020-yilgi saylovlarda u Tramp tomonida ekanligini omma oldida bildirmagan.
Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi. Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda besh kishi halok bo‘ldi. Keyinroq, 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi. Tramp ovoz berish yakunlaridan hamon norozi bo‘lsa-da, vakolatlarni saylangan prezidentga topshirishga tayyorligini e’lon qildi.
Izoh (0)