O‘zbekistonda eski namunadagi 50, 100, 200 va 500 so‘mlik banknotlar va tangalarni Markaziy bankning hududiy bosh boshqarmalarida amaldagi pul belgilariga almashtirib berishning oxirgi muddati 2022-yil 1-yanvar etib belgilandi. Markaziy bank boshqaruvining tegishli qarori 9-yanvar kuni qabul qilingan.
Eslatib o‘tamiz, “O‘zbekiston Respublikasi Markaziy bankining eski namunadagi 50 va 100 so‘mlik tangalarini, shuningdek, 50, 100, 200 va 500 so‘mlik banknotlarini ayirboshlash hamda muomaladan qaytarib olish tartibi to‘g‘risida”gi nizomga asosan:
- 1997-yil namunasidagi 200 so‘mlik;
- 1999-yil namunasidagi 500 so‘mlik banknotlar 2020-yil 1-iyuldan qonuniy to‘lov vositasi sifatida o‘z kuchini yo‘qotgan.
2020-yil 1-iyuldan buyon ushbu nominaldagi banknotlar, shuningdek, 50 va 100 so‘mlik tangalar va banknotlar faqat Markaziy bankning hududiy Bosh boshqarmalari Hisob-kitob kassa markazlari tomonidan qabul qilinib, muomaladagi pul belgilariga almashtirib berilmoqda.
“Tahlil va murojaatlarga ko‘ra, aholi qo‘lida hanuz ma’lum miqdorda eski namunadagi 50, 100, 200 va 500 so‘mlik tangalar va banknotlar saqlanib qolmoqda”, — deyiladi Markazi bank xabarida.
Shunday qilib, fuqarolar qo‘llarida qolib ketgan eski namunadagi 50, 100, 200 va 500 so‘mlik banknotlar va tangalarni 2022-yilning 1-yanvariga qadar Markaziy bankning joylardagi Hisob-kitob kassa markazlarida muomaladagi pul belgilariga almashtirib olishi mumkin.
Izoh (0)