Ўзбекистонда эски намунадаги 50, 100, 200 ва 500 сўмлик банкнотлар ва тангаларни Марказий банкнинг ҳудудий бош бошқармаларида амалдаги пул белгиларига алмаштириб беришнинг охирги муддати 2022 йил 1 январь этиб белгиланди. Марказий банк бошқарувининг тегишли қарори 9 январь куни қабул қилинган.
Эслатиб ўтамиз, «Ўзбекистон Республикаси Марказий банкининг эски намунадаги 50 ва 100 сўмлик тангаларини, шунингдек, 50, 100, 200 ва 500 сўмлик банкнотларини айирбошлаш ҳамда муомаладан қайтариб олиш тартиби тўғрисида»ги низомга асосан:
- 1997 йил намунасидаги 200 сўмлик;
- 1999 йил намунасидаги 500 сўмлик банкнотлар 2020 йил 1 июлдан қонуний тўлов воситаси сифатида ўз кучини йўқотган.
2020 йил 1 июлдан буён ушбу номиналдаги банкнотлар, шунингдек, 50 ва 100 сўмлик тангалар ва банкнотлар фақат Марказий банкнинг ҳудудий Бош бошқармалари Ҳисоб-китоб касса марказлари томонидан қабул қилиниб, муомаладаги пул белгиларига алмаштириб берилмоқда.
«Таҳлил ва мурожаатларга кўра, аҳоли қўлида ҳануз маълум миқдорда эски намунадаги 50, 100, 200 ва 500 сўмлик тангалар ва банкнотлар сақланиб қолмоқда», — дейилади Маркази банк хабарида.
Шундай қилиб, фуқаролар қўлларида қолиб кетган эски намунадаги 50, 100, 200 ва 500 сўмлик банкнотлар ва тангаларни 2022 йилнинг 1 январига қадар Марказий банкнинг жойлардаги Ҳисоб-китоб касса марказларида муомаладаги пул белгиларига алмаштириб олиши мумкин.
Изоҳ (0)