Jizzaxda qulagan bino qo‘y naslchiligi bilan shug‘ullanuvchi fermer xo‘jaligi tomonidan qurilgani aniqlandi. Uning rahbari qurilishga aloqasi yo‘qligini aytmoqda

Jizzax shahrining Mustaqillik ko‘chasida qurilayotgan ko‘p qavatli uyning bir qismi 10-yanvar kuni qulab tushgani, qurilish “Chorvador-Qorako‘l-Baraka” kompaniyasi tomonidan olib borilgani haqida xabar berilgandi. O‘zA qulagan inshoot egasi “Chorvador-Qorako‘l-Baraka” MChJ emas, “Barakali qorako‘l chorvador” fermer xo‘jaligi ekanligini ma’lum qildi.

“Gazeta.uz”ning yozishicha, Jizzax viloyati qurilish bosh boshqarmasi boshlig‘i Mahmud Tursunov tahririyat muxbiri bilan suhbatda mazkur ma’lumotni tasdiqladi. U fermer xo‘jaligi “Arxitektura-qurilish nazorati davlat inspeksiyasida ro‘yxatdan o‘tgan”ini ta’kidlagan. Qo‘y naslchiligi bilan shug‘ullanuvchi fermer xo‘jaligi turar-joy binolari qurilishi bilan shug‘ullanishga huquqi bor yoki yo‘qligiga oid savolga Mahmud Tursunov agar ushbu yo‘nalish fermer xo‘jalik nizomida ko‘rsatilgan bo‘lsa, unda mumkin, deya javob bergan.

Maxmud Tursunov, shuningdek, hozircha fermer xo‘jaligi avval qurilish ishlari bilan shug‘ullangani haqida biror ma’lumotga ega emasligini ham tan olgan. Uning so‘zlariga ko‘ra, bu dalillarni o‘rganish uning vazifasiga kirmaydi — bu bilan huquqni muhofaza qilish organlari shug‘ullanadi.

Ta’kidlanishicha, qurilishning buyurtmachisi ham, pudratchisi ham uning egasi, ya’ni — Barakali Qorako‘l Chorvador fermer xo‘jaligining o‘zi bo‘lgan. “Hozircha savollar ko‘p. Savollarga fermer xo‘jaligi ish boshqaruvchi Akmal Boboyev: — Shukur, hodisa dam olish kuni sodir bo‘lgani uchun odamlar jabrlanmadi, — deb javob berdi”, deyiladi xabarda.

“Gazeta.uz” muxbiri vaziyatga oydinlik kiritish maqsadida fermer xo‘jalik rahbari bilan bog‘lanib, uning oldin ham qurilish bilan shug‘ullangan yoki yo‘qligi bilan qiziqqan. Abdullaxakimov “binoni o‘zi men qurmaganman”, deya javob bergan.

“Qurilish qilmoqchi bo‘lganman, qimmat bo‘lgani sababli uni qilolmas ekanman, deganman. Keyin, 2020-yil aprel oyida fuqaro Abdurahim Boboyevga o‘tkazilgan mulk huquqi. Noldan qurgan odam shu kishi. Bugun (11-yanvar) tergovchiga borib uchrashib, hamma hujjatlarni taqdim qildim. Tushuntirish xati yozib berdim, bu narsaga mening umuman aloqam yo‘qligini aytdim. Boshida ikki qavatli do‘konlarni davom ettirmoqchi edim. Bu yo‘lning usti, ikki qavatli bino bo‘lsa, ‘snos’ga tushadi, degan gap bo‘lganidan keyin, ko‘p qavatli quraman deb, Jizzax shahar hokimiyatiga ariza beruvdim. Lekin unga kuchim yetmadi, qilolmadim. Abdurahim Boboyevga hamma hujjatlarni topshirib yuborganman. Ko‘chmas mulkni kelgusida qurilish bilan shug‘ullanish uchun bermaganman, qurilish qilolmayman deb, ko‘chmas mulkni sotganman. Men uni begonalashtirdim, keyin umuman aralashmadim”, — degan Jahongir Abdullaxakimov.

O‘zA xabarida fermer xo‘jalik ish boshqaruvchisi Akmal Boboyev haqida ham ma’lumotlar keltirilgan. Jahongir Abdullaxakimovning aytishicha, u ko‘chmas mulkni sotib olgan Abdurahim Boboyevning o‘g‘li hisoblanadi va fermer xo‘jalikka umuman aloqasi yo‘q.

U, shuningdek, Abdurahim Boboyev telefon raqami va uning kompaniyasi haqida hech nima bilmasligini aytdi. Qolaversa, bu ish bilan shahar prokuraturasida tergovchi Tolmas Rahmonov shug‘ullanayotganini qo‘shimcha qilgan. Tergovchi “Gazeta.uz” muxbiri bilan suhbatda hozirda tergovga qadar tekshiruv harakatlari olib borilayotgani va hech qanday axborot bera olmasligini qayd etgan.

Vazirlar Mahkamasining farmoyishi bilan Jizzaxda qurilishi tugallanmagan olti qavatli uyning qulab tushishi sabablarini o‘rganish bo‘yicha Ochilboy Ramatov boshchiligidagi hukumat komissiyasi tuzilgandi. Hukumat komissiyasi 12-yanvar kuni Jizzax shahrida qurilayotgan ko‘p qavatli turar-joy binosining qulashi sabablarini o‘rganish hamda kelgusida shu kabi holatlarning oldini olish bo‘yicha yig‘ilish o‘tkazishi rejalashtirilgan. “Daryo” manbasining xabar berishicha, Ochilboy Ramatov Jizzaxdagi voqea joyiga yetib bordi. Yig‘ilishda barcha komissiya a’zolari hamda tegishli vazirlik va idoralar xodimlari ham ishtirok etadi.