Turkiyada o‘zbekistonlik jurnalist Abdukarim Mirzayev ozodlikka chiqarildi. Bu haqda 12-yanvar kuni jurnalistning Telegram-kanalida ma’lum qilindi.
Turkiyaning Kastamonu universiteti Kommunikatsiyalar fakulteti jurnalistika bo‘limi magistranti Abdukarim Mirzayev 11-dekabr kuni turk politsiyasi tomonidan qo‘lga olingandi.
Shundan so‘ng O‘zbekiston Bosh prokuraturasi bu ishda rasmiy Toshkentning aloqasi yo‘qligini ma’lum qilgan.
Uni huquqiy jihatdan himoya qilish uchun yollangan advokat vaziyatni o‘rgangach kimdir Abdukarim Mirzayevga tegishli raqam orqali shubhali shaxslar bilan muloqotda bo‘lgani haqida xabar bergani, ushbu ma’lumot ortidan jurnalist kuzatilib, so‘ngra qo‘lga olinganini aniqlagan.
Ma’lum qilinishicha, 10-dekabrdan 11-dekabrga o‘tar kechasi harbiy libosdagi to‘rt kishi, shuningdek, fuqaro kiyimidagi shaxslar Abdukarim Mirzayevning uyiga kelib, tintuv o‘tkazgan. So‘ng ular hujjatlarni rasmiylashtirib, jurnalistni olib ketgan.
Jurnalistga nisbatan gumonlar o‘z tasdig‘ini topmagan. Shunga qaramay, u bir oy davomida deportatsiya bo‘linmasida qolishiga to‘g‘ri keldi. Bundan avval Mirzayevning deportatsiya qilinmasligi aytilgan.
Avvalroq Abdukarim Mirzayev bilan aloqada bo‘lgan “shubhali shaxslar”ga nisbatan gumonlar ham tasdiqlanmagani, bu esa Abdukarim Mirzayevni ham qo‘yib yuborilishiga olib kelishi mumkinligi ma’lum qilingandi.
Izoh (0)