Murojaat bilan kelgan fuqarolarga “Stolba yiqilsa, toksiz o‘tiring” degan Sayxunobod elektr ta’minoti korxonasi rahbariga nisbatan tekshiruv tayinlandi

Sirdaryo viloyatining Sayxunobod tumani elektr ta’minoti korxonasi rahbariga nisbatan xizmat tekshiruvi o‘tkazilishi belgilandi.

Ijtimoiy tarmoqlarda 12-yanvar, seshanba kuni Sayxunobod tuman elektr ta’minoti korxonasi rahbari bilan bog‘liq videolavha tarqaldi. Videoda Sayxunobod tuman elektr ta’minoti korxonasi rahbari huzuriga kelgan fuqarolarga “stolba qo‘yib bera olmasligi”ni, fuqarolardan birining “stolba yiqilib odam o‘lsa, nima bo‘ladi?” degan gapiga javoban “stolba yiqilsa, toksiz o‘tiring” degani aks etgan.

“Sirdaryo hududiy elektr tarmoqlari korхonasi” matbuot xizmati ushbu video yuzasidan rasmiy munosabat bildirib, Sayxunobod tuman elektr ta’minoti korxonasi rahbari Sh.Jo‘rayevga nisbatan xizmat tekshiruvi o‘tkazilishi belgilanganini ma’lum qildi.  “Xizmat tekshiruvi natijalari yuzasidan batafsil ma’lumot berilishini ma’lum qilamiz”, — deyiladi xabarda.

Shuningdek, ijtimoiy tarmoqlarda mazkur rahbarning O‘zbekistonda koronavirus tarqalishining oldini olish bo‘yicha Respublika maxsus komissiyasi tomonidan karantin davrida belgilangan maska rejimiga rioya qilmay, belgilangan qoidalarni buzganligi to‘g‘risida ham qo‘shimcha fikrlar tarqalmoqda.

Avvalroq “Xorazm hududiy elektr tarmoqlari korxonasi” rahbari pora bilan qo‘lga olingani haqida xabar berilgan edi.