Bugundan Yoshlar ijod saroyida “O‘zbek milliy kino san’ati haftaligi” start oldi. “O‘zbekkino” milliy agentligi tomonidan yuqori darajada tashkillashtirilgan haftalikning birinchi kuni qiziqarli va yorqin lahzarga boy bo‘ldi.
Kunning birinchi qismida bosh vazir o‘rinbosari Behzod Musayev ishtirokida kinoijodkorlar bilan soha oldidagi vazifalar bo‘yicha muhokamalar bo‘lib o‘tdi.
Keyinchalik yoshlar uchun ssenariynavislik bo‘yicha mahorat darsi va yangi loyihalar uchun kasting o‘tkazildi.
O‘zbek shou-biznesining taniqli vakillari va mashhur aktyor aktrisalarning qizil yo‘lakchadan o‘tishi marosimga o‘zgacha ruhiyat bag‘ishladi.
Qizil yo‘lakchadan so‘ng haftalikka tashrif buyurgan mehmonlar konsert dasturida raqsga tushishdi.
Yilning bunday birinchiyirik tadbiri oddiy tomoshabinlar va yulduzlarni birlashtirdi deya aytsak mubolag‘a bo‘lmaydi.
So‘ngra “O‘zbekkino” milliy agentligi tomonidan 2021-yilda suratga olinadigan filmlarning taqdimoti bo‘ldi.
Unda ijodkorlarning o‘zlari loyihalarini jamoatchilikka tanishtirdi.
Loyihalar orasida bir-biridan farqli, turfa va kutilmagan filmlar borligi ko‘pchilikda qiziqish uyg‘otdi.
Kunning so‘nggida rejissor Muhammadali Iskandarovning “Men terrorchi emasman” filmi premyerasi taqdim etildi. Yangicha usulda suratga olingan harbiy drama tomoshabinlarga manzur keldi. Shundan so‘ng “O‘zbekkino” media klubi a’zolari, jurnalist va blogerlar bilan film bo‘yicha fikr almashinuvi va muhokamalar uyushtirildi.
Haftalikning keyingi kunlari ham mazmunli tadbir va marosimlarga boy bo‘lishi kutilmoqda. Xususan, hujjatli, badiiy va animatsion filmlar namoyishi, taniqli kinorejissor va aktyorlar tomonidan o‘tkaziladigan mahorat darslari, yangi filmlar premyeralari bo‘lib o‘tishi rejalashtirilgan.
Ushbu kino haftalik O‘zbekiston Respublikasi Prezidenti Shavkat Mirziyoyevning 2020-yil 20-noyabrda “O‘zbekfilm” kinostudiyasiga tashrifi davomida berilgan topshiriqlari yuzasidan amalga oshirilmoqda.
Reklama huquqi asosida.
Izoh (0)