Бугундан Ёшлар ижод саройида «Ўзбек миллий кино санъати ҳафталиги» старт олди. «Ўзбеккино» миллий агентлиги томонидан юқори даражада ташкиллаштирилган ҳафталикнинг биринчи куни қизиқарли ва ёрқин лаҳзарга бой бўлди.
Куннинг биринчи қисмида бош вазир ўринбосари Беҳзод Мусаев иштирокида киноижодкорлар билан соҳа олдидаги вазифалар бўйича муҳокамалар бўлиб ўтди.
Кейинчалик ёшлар учун сценарийнавислик бўйича маҳорат дарси ва янги лойиҳалар учун кастинг ўтказилди.
Ўзбек шоу-бизнесининг таниқли вакиллари ва машҳур актёр актрисаларнинг қизил йўлакчадан ўтиши маросимга ўзгача руҳият бағишлади.
Қизил йўлакчадан сўнг ҳафталикка ташриф буюрган меҳмонлар концерт дастурида рақсга тушишди.
Йилнинг бундай биринчийирик тадбири оддий томошабинлар ва юлдузларни бирлаштирди дея айтсак муболаға бўлмайди.
Сўнгра «Ўзбеккино» миллий агентлиги томонидан 2021 йилда суратга олинадиган фильмларнинг тақдимоти бўлди.
Унда ижодкорларнинг ўзлари лойиҳаларини жамоатчиликка таништирди.
Лойиҳалар орасида бир-биридан фарқли, турфа ва кутилмаган фильмлар борлиги кўпчиликда қизиқиш уйғотди.
Куннинг сўнггида режиссёр Муҳаммадали Искандаровнинг «Мен террорчи эмасман» фильми премьераси тақдим этилди. Янгича усулда суратга олинган ҳарбий драма томошабинларга манзур келди. Шундан сўнг «Ўзбеккино» медиа клуби аъзолари, журналист ва блогерлар билан фильм бўйича фикр алмашинуви ва муҳокамалар уюштирилди.
Ҳафталикнинг кейинги кунлари ҳам мазмунли тадбир ва маросимларга бой бўлиши кутилмоқда. Хусусан, ҳужжатли, бадиий ва анимацион фильмлар намойиши, таниқли кинорежиссёр ва актёрлар томонидан ўтказиладиган маҳорат дарслари, янги фильмлар премьералари бўлиб ўтиши режалаштирилган.
Ушбу кино ҳафталик Ўзбекистон Республикаси Президенти Шавкат Мирзиёевнинг 2020 йил 20 ноябрда «Ўзбекфильм» киностудиясига ташрифи давомида берилган топшириқлари юзасидан амалга оширилмоқда.
Реклама ҳуқуқи асосида.
Изоҳ (0)