Qozog‘istonning yirik Magnum Cash&Carry savdo tarmog‘i Toshkentda filial ochishni rejalashtirayotgani haqida xabar berilgandi. Spot’ning ma’lum qilishicha, reteyler Toshkentda asosiy formati gipermarket bo‘lgan 6 tagacha savdo nuqtasi ochishni rejalashtirgan.
Agar kompaniya ushbu rejalarni amalga oshira olsa, u yana bir chet ellik raqib — Fransiyaning Carrefour savdo tarmog‘i bilan ikkinchi marotaba bir bozorda bo‘ladi. Majid Al Futtaim kompaniyasi boshqaruvida bo‘lgan Carrefour 2020-yilning oxirlarida Toshkentda birinchi supermarketni ochgandi.
Magnum Cash&Carry va Carrefour Qozog‘iston bozorida 2016—2017-yillarda raqobatlashgan. O‘zbekistonda bo‘lgani kabi Qozog‘istonga ham Carrefour’ni Majid Al Futtaim olib kirgan. Magnum unga qadar bozor savdosida yetakchilardan biri hisoblangan.
Qozog‘istonda Carrefour’ning birinchi do‘koni 2016-yil fevral oyida 8 ming kvadrat metr maydonda ochilgan. Kompaniya Olmaotada beshta va Ostona shahrida kamida to‘rtta gipermarket ochishni rejalashtirgandi, ammo 2017-yilda bozorni tark etishga qaror qildi. Asosiy sabab — devalvatsiya va shiddatli raqobat.
“Carrefour, afsuski, Magnum Cash&Carry chakana savdo tarmog‘i bilan raqobatlasha olmadi”, — degan birinchi Carrefour supermarketi joylashgan Grand Park savdo majmuasining bosh direktori Gabit Beysenbayev. Uning so‘zlariga ko‘ra, Qozog‘istondagi moliyaviy holat ham, ya’ni aholining xarid qilish qobiliyatining pasayishi bunga ta’sir ko‘rsatgan.
O‘zbekistonda Magnum va Carrefour 2021-yilda bir nechta supermarketlar ochish rejasini e’lon qildi. Ikkala brendning ritorikasi juda o‘xshash — ikkisi ham iqtisodiyot va jamiyatga ko‘p foyda keltirish hamda ko‘plab ish o‘rinlarini yaratishga va’da bermoqda.
Izoh (0)