O‘zbekistonda 2021-yil 1-martdan boshlab aholining minimal iste’mol xarajatlari e’lon qilinadi hamda bu kambag‘allik chegarasini bilish va shunga qarab samarali choralar ko‘rish imkonini beradi. Bu haqda Qonunchilik palatasi deputati O‘rol O‘rozboyevga tayanib, “Kun.uz” ma’lum qildi.
“Respublikamiz bo‘yicha ‘temir daftar’larga kiritilgan har bir oilalarni kambag‘allikdan chiqarish borasida mutlaq yangi mexanizmlar joriy etiladi. Ya’ni kasb-hunarga o‘rgatish bo‘yicha mingdan ortiq o‘quv markazlari tashkil qilinadi.
Qarang, o‘quv kurslariga kelgan har bir fuqaroga bir million so‘mdan subsidiya ajratilar ekan. Bu maqsadga davlat budjetidan o‘rtacha 100 milliard so‘m mablag‘ ajratiladi. Yana bir tomoni har bir o‘quv kursini bitirgan tinglovchilarga tadbirkorlikka yo‘naltirilgan uskunalarni xarid qilish uchun o‘rtacha 7 million so‘mgacha subsidiya beriladi. Endi o‘ylab ko‘raylik, qachon hunar o‘rganib, ish boshlash uchun bunday real imkoniyatlar bo‘lgan?” – deydi O‘rol O‘rozboyev.
Eslatib o‘tamiz, Prezident Shavkat Mirziyoyev raisligida 2020-yil 3-iyun kuni kambag‘allikni qisqartirish masalalari bo‘yicha o‘tkazilgan videoselektor yig‘ilishida 2020-yil 1-oktabrgacha tirikchilik uchun zarur eng kam miqdor va minimal iste’mol savatchasining huquqiy asoslari ishlab chiqilishini ma’lum qilingan edi.
Shundan so‘ng Shavkat Mirziyoyev 2020-yil 29-dekabr kuni Oliy Majlisga yo‘llagan Murojaatnomasida 2021-yilda aholining minimal iste’mol xarajatlari e’lon qilinishini ta’kidladi.
Izoh (0)