Қозоғистоннинг йирик Magnum Cash&Carry савдо тармоғи Тошкентда филиал очишни режалаштираётгани ҳақида хабар берилганди. Spot’нинг маълум қилишича, ретейлер Тошкентда асосий формати гипермаркет бўлган 6 тагача савдо нуқтаси очишни режалаштирган.
Агар компания ушбу режаларни амалга ошира олса, у яна бир чет эллик рақиб — Франциянинг Carrefour савдо тармоғи билан иккинчи маротаба бир бозорда бўлади. Majid Al Futtaim компанияси бошқарувида бўлган Carrefour 2020 йилнинг охирларида Тошкентда биринчи супермаркетни очганди.
Magnum Cash&Carry ва Carrefour Қозоғистон бозорида 2016—2017 йилларда рақобатлашган. Ўзбекистонда бўлгани каби Қозоғистонга ҳам Carrefour’ни Majid Al Futtaim олиб кирган. Magnum унга қадар бозор савдосида етакчилардан бири ҳисобланган.
Қозоғистонда Carrefour’нинг биринчи дўкони 2016 йил февраль ойида 8 минг квадрат метр майдонда очилган. Компания Олмаотада бешта ва Остона шаҳрида камида тўртта гипермаркет очишни режалаштирганди, аммо 2017 йилда бозорни тарк этишга қарор қилди. Асосий сабаб — девальвация ва шиддатли рақобат.
«Carrefour, афсуски, Magnum Cash&Carry чакана савдо тармоғи билан рақобатлаша олмади», — деган биринчи Carrefour супермаркети жойлашган Grand Park савдо мажмуасининг бош директори Габит Бейсенбаев. Унинг сўзларига кўра, Қозоғистондаги молиявий ҳолат ҳам, яъни аҳолининг харид қилиш қобилиятининг пасайиши бунга таъсир кўрсатган.
Ўзбекистонда Magnum ва Carrefour 2021 йилда бир нечта супермаркетлар очиш режасини эълон қилди. Иккала бренднинг риторикаси жуда ўхшаш — иккиси ҳам иқтисодиёт ва жамиятга кўп фойда келтириш ҳамда кўплаб иш ўринларини яратишга ваъда бермоқда.
Изоҳ (0)