O‘zbekistonda 2017—2020-yillarda chaqaloq savdosi bilan bog‘liq 185 ta holat aniqlangan

O‘zbekistonda 2017—2020-yillar mobaynida chaqaloqlar savdosi bo‘yicha 185 ta holat aniqlangan. Bu haqda IIV huzuridagi Tergov departamenti vakili Nargiza Xojiboyeva AOKAda o‘tkazilgan brifing davomida ma’lum qildi.

Uning so‘zlariga ko‘ra, chaqaloq savdosiga sabab bo‘layotgan asosiy omillar quyidagilar:

• bolaning onasi ijtimoiy himoyalanmagani va moddiy ehtiyojlari ta’minlanmaganligi;
• turmushga chiqmagan ayollar homilador ekani hamda chaqaloqni oilasidan yashirishga urinishi;
• farzand ko‘rmagan oilalar tomonidan chaqaloq asrab olishga ehtiyoj mavjudligi;
• chaqaloq savdosining oldini olishga qaratilgan mukammal huquqiy asosning yo‘qligi.

Tahlillarga ko‘ra, odam savdosi bilan bog‘liq jinoyatlar 2020-yilda 2012-yildagiga nisbatan olti barobarga kamaygan.Tadbir davomida ta’kidlanishicha, butun respublika bo‘yicha 30 yoshdan yuqori ayollar bilan suhbatlar o‘tkazilgan. Jami 6,5 milliondan ortiq xotin-qizning ijtimoiy holati, ularni qiynayotgan muammolar o‘rganib chiqilgan.Ma’lumot uchun, mamlakatda 2018-yilda odam savdosi jinoyatlari ichida chaqaloq savdosining ulushi 38 foizni, 2019-yilda esa 44 foizni tashkil qilgan. 2017—2020-yillardagi holatlar tahliliga ko‘ra, o‘z chaqalog‘ini sotgan ayollarning 31 foizi og‘ir ijtimoiy ahvolda ekanligi sababli, 17 foizi homilani yashirish, 52 foizi esa moddiy manfaat topish maqsadida ushbu jinoyatlarni sodir etgan.