“Andijon va Qashqadaryo voqealariga yo‘l qo‘ymasligimiz kerakligini anglab yetdik” – Ombudsman qiynoqlar haqida

Oliy Majlisnig Inson huquqlari bo‘yicha vakili (Ombudsman) Ulug‘bek Muhammadiyev 2020-yilning 29-dekabr kuni Kongress xollda o‘tkazilgan Prezident Shavkat Mirziyoyevning Murojaatnomasiga bag‘ishlangan tadbirdan so‘ng “Daryo” muxbiri Mirolim Isajonovga qisqa intervyu berdi.

Ulug‘bek Muhammadiyevning aytishicha, qiynoqlar masalasi ko‘p yillar O‘zbekiston uchun tamg‘a bo‘lib kelgan.

Davlatimiz rahbari o‘z Murojaatnomasida yana bir muhim jihatga, ya’ni qiynoqlar masalasiga e’tibor qaratdi. Bu haqiqatan juda og‘riqli masala, ko‘p yillar bizga tamg‘a bo‘lib kelgan. Barchamiz ko‘rib, bilib turibmiz oxirgi yillardagi islohotlar tufayli bunday narsalarni endi yashirishning imkoniyati yo‘q. Bu kabi holatlar tezda jamoatchilik nazariga tushib, muhokama qilinyapti, javobgarlar jazosini ham olmoqda. Hammamiz bu haqda ommaviy axborot vositalari orqali ham tanishdik. O‘sha Andijon va Qashqadaryo voqealariga yo‘l qo‘ymasligimiz kerakligini anglab yetdik.

Prezidentimiz shu narsani oldimizga qo‘ymoqda, Ombudsman, jamoat idoralari va inson huquqlarini himoya qiluvchi tashkilotlar birgalikda parlamentda ma’ruza bilan chiqish qiladi. Ya’ni mamlakatda kuzatilayotgan qiynoqlar holati, ularning oldini olish bo‘yicha qilingan ishlar va bunga yo‘l qo‘ymaslik yuzasidan bo‘layotgan harakatlar haqida keng jamoatchilikni xabardor qilish maqsadida Parlamentga hisobot berish masalasi qo‘yilmoqda. O‘ylaymanki, bu ham judayam muhim katta bir demokratik qadam. Davlatimiz rahbari ma’ruzasi so‘nggida “Biz bu demokratik o‘zgarishlar yo‘lidan ortga qaytmaymiz”, degan g‘oyani yana bir marta takrorladi. Bu yurtimizdagi har bir fuqaroga yetib boradigan so‘z bo‘ldi. Bu insonparvarlik va demokratik jarayonlar, o‘zgarish va islohotlar faqat oldinga ketadi, ortga yo‘l yo‘q, degani.

Ulug‘bek Muhammadiyev, Oliy Majlisnig Inson huquqlari bo‘yicha vakili