Samarqand viloyati sog‘liqni saqlash muassasalari tomonidan noqonuniy ravishda budjet mablag‘larini talon-toroj qilish holatlari aniqlandi, deya xabar qilmoqda Korrupsiyaga qarshi kurashish agentligi.
Ta’kidlanishicha, Korrupsiyaga qarshi kurashish agentligi tomonidan Moliya vazirligi huzuridagi Inqirozga qarshi kurashish jamg‘armasi mablag‘larining maqsadli sarflanishi bo‘yicha hududlarda o‘rganishlar o‘tkazildi.
Xususan, agentlik tomonidan Moliya vazirligi Davlat moliyaviy nazorat departamenti va Monopoliyaga qarshi kurashish qo‘mitasi bilan hamkorlikda Samarqand viloyat sog‘liqni saqlash boshqarmasi va uning quyi tizimlarida budjet mablag‘lari, davlat aktivlarini realizatsiya qilish va davlat xaridlari sohasida qonun hujjatlariga rioya etish holati bo‘yicha o‘rganish o‘tkazilgan.
O‘rganishlarda viloyat sog‘liqni saqlash muassasalari tomonidan 9 milliard 256 million so‘mlik dori vositalariga muqobil tijorat takliflari mavjud bo‘lgani holda, 14 milliard 902 million so‘mga, ya’ni 5 milliard 643 million so‘m qimmat narxlarda davlat xaridlarni amalga oshirilgani aniqlangan. Shuningdek, davlat xaridlarini amalga oshirishda 4 milliard 999 million so‘mlik qiymatdagi tender va 186 million 100 ming so‘mlik elektron do‘kon shaklidagi xaridlar davlat xaridlariga oid qonun talablariga zid ravishda tashkil qilingan.
Bundan tashqari, viloyat sog‘liqni saqlash muassasalari tomonidan 2020-yil 9 oyi davomida jami 1 milliard 384 million so‘mlik talon-torojlik, moliyaviy xato va kamchiliklarga yo‘l qo‘yilgan.
Misol uchun, Respublika shoshilinch tibbiy yordam ilmiy markazi Samarqand filiali tomonidan tez tibbiy yordam brigadalariga jalb qilinmagan hamda ishlayotgan shtat birligiga nisbatan ortiqcha 48 nafar xodimga 124,5 million so‘m rag‘batlantirish uchun ortiqcha mablag‘ to‘langan.
Ishchi guruh tomonidan aniqlangan talon-torojlik va suiiste’molchiliklar miqdori jami 7 milliard so‘mni tashkil etdi.
O‘rganish yakunlari bo‘yicha to‘plangan hujjatlar Korrupsiyaga qarshi kurashish agentligi tomonidan Bosh prokuraturaga yuborildi.
Mazkur hujjatlar asosida Samarqand viloyat prokuraturasi tomonidan viloyat sog‘liqni saqlash muassasalari va viloyat sanitariya epidemiologik osoyishtalik markazi mansabdor shaxslariga nisbatan Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish), 205-moddasi 2-qismi “a” bandi (juda ko‘p miqdorda zarar yetkazgan holda hokimiyat yoki mansab vakolatini suiiste’mol qilish) bilan jinoyat ishi qo‘zg‘atilib tergov harakatlari olib borilmoqda.
Avvalroq samarqandlik mansabdorlar ikki yil davomida davlatga 25,3 milliard so‘m zarar keltirgani, Samarqandda davlatga salkam 56 milliard so‘m zarar yetkazgan kadastr korxonasi mansabdorlari ustidan jinoyat ishi ochilgani hamda xalq ta’limi tizimida 70 milliard so‘mlik o‘g‘rilik va o‘zlashtirish holatlari aniqlangani haqida xabar berilgandi.
Izoh (0)