Toshkent viloyati Ohangaron tumanida fermer xo‘jaligiga o‘g‘irlik uyushtirgan 5 nafar shaxs qo‘lga olindi, deya xabar bermoqda Tergov departamenti.
Ma’lum qilinishicha, 2020-yilning 25-dekabr kuni soat 20:30 larda muqaddam sudlangan 30 yoshli Abduhamid F. o‘zganing mol-mulkini bosqinchilik yo‘li bilan talon-toroj qilish maqsadida tanishlari 26 yoshli Sa’dulla A., Shohrux F. hamda 25 yoshli Hasan S. va Davron ismli shaxslar bilan oldindan jinoiy til biriktirgan.
Ular bir guruh bo‘lib, Ohangaron tumani “Shodmalik” MFYda joylashgan fermer xo‘jaligiga kirgan. Xo‘jalik qorovulxonasidagi oynani sindirib, oyna sinig‘i va o‘sha yerda bo‘lgan yog‘och tayoqlar bilan qurollanib, fermer xo‘jaligining 9 nafar ishchisiga hujum qilib, ularni o‘ldirish bilan qo‘rqitgan.
Jinoiy guruh ishchilarga turli xil tan jarohatlari yetkazib, narxi 120 ming so‘mlik ikki dona Maxvi rusumli qo‘l telefonlari va narxi 145 ming so‘mlik qora rangli kurtka, narxi 150 ming so‘m bo‘lgan Fly rusumli qo‘l telefoni, narxi 40 ming so‘mlik Nokia 1110 rusumli uyali telefoni hamda narxi 180 000 so‘mlik Inoi rusumli uyali telefonlarini talon-toroj qilib, hodisa joyidan yashiringan.
Natijada fermer xo‘jalik ishchilari turli tan jarohatlari bilan Ohangaron tumani markaziy shifoxonasiga murojaat qilgan.
Olib borilgan tergovga qadar tekshiruv jarayonida yuqoridagi shaxslardan ashyoviy dalil tariqasida talon-toroj qilingan buyumlar rasmiylashtirib olingan.
Mazkur holat yuzasidan Ohangaron tumani IIB huzuridagi Tergov bo‘limi tomonidan Jinoyat kodeksining 164-moddasi 2-qismi “B” bandi (bir guruh shaxslar tomonidan oldindan til biriktirib sodir etilgan bosqinchilik) bilan jinoyat ishi qo‘zg‘atilgan.
Tergov jarayonida yuqoridagi jinoyatni sodir etgan shaxslarning har biriga ayblov e’lon qilinib, qamoqqa olish tarzidagi ehtiyot chorasi qo‘llanilgan.
Avvalroq Qo‘yliqda fohishalik qiluvchi ayol mijoz sifatida kelgan erkakning telefoni va 500 dollarini tunab ketgani, Buxoroda o‘g‘irlik qilishiga xalaqit bergan 13 yoshli qizni bolg‘a bilan urib o‘ldirishga uringan ayol hamda Toshkent viloyatida Milliy gvardiya harbiy kiyimini kiyib olgan bosqinchilar qo‘lga olingani haqida xabar berilgandi.
Izoh (0)