Namanganda aroqdan zaharlanish oqibatida vafot etganlar soni besh kishiga yetdi. Bu haqda “Daryo” muxbiri xabar bermoqda.
Oldinroq viloyatning To‘raqo‘rg‘on tumanida 2020-yil oxirlarida 12 nafar fuqaro o‘tkir zaharlanish tashxisi bilan shifoxonaga yotqizilgani, ularning ikki nafari vafot etgani haqida xabar berilgandi.
“Daryo” muxbirining aniqlik kiritishicha, To‘raqo‘rg‘on tumanidagi “Sohilobod” mahallasida yashovchi sakkiz nafar yigit Yangi yil arafasidagi bayram dasturxonida qo‘lbola aroqdan zaharlanib, 2020-yil 31-dekabr kuni soat 08:10 da tuman tibbiyot birlashmasining reanimatsiya bo‘limiga olib kelingan.
2021-yilning dastlabki kunlari esa tumanning boshqa mahallalarida yashovchi yana besh nafar fuqaro alkogol surrogatidan zaharlanish tashxisi bilan shifoxonalarga yotqizilgan. Shu tariqa, zaharlanganlarning umumiy soni 13 kishiga yetgan, ulardan biri Mingbuloq tuman tibbiyot birlashmasiga olib borilgan.
Ko‘rsatilgan tibbiy muolajalarga qaramay, zaharlanganlardan dastlab ikki, keyinchalik uch nafari hayotdan ko‘z yumdi. Ularning eng kattasi 52, eng kichigi esa 36 yoshda bo‘lgan.
Tuman tibbiyot birlashmasi boshlig‘i Dilmurod Ismoilovning aytishicha, hozirda olti nafar bemor sog‘ayib, uyiga javob berilgan, ikki nafari esa reanimatsiya bo‘limida og‘ir ahvolda qolmoqda.
“Dastlabki xulosalarga qaraganda, zaharlanish ‘Gradusnik’ nomli qo‘lbola spirtli ichimlik iste’molidan kelib chiqqan. Zudlik bilan aholi o‘rtasida tushuntirish ishlari olib borilgani tufayli boshqa bunday holatlar yuz bermadi”,— deydi Dilmurod Ismoilov.
Tuman prokurori Elyorbek Talaboyevga ko‘ra, ushbu holat yuzasidan jinoyat ishi ochilgan, hozirda tergov harakatlari olib borilmoqda.
Izoh (0)