Самарқанд вилояти соғлиқни сақлаш муассасалари томонидан ноқонуний равишда бюджет маблағларини талон-торож қилиш ҳолатлари аниқланди, дея хабар қилмоқда Коррупцияга қарши курашиш агентлиги.
Таъкидланишича, Коррупцияга қарши курашиш агентлиги томонидан Молия вазирлиги ҳузуридаги Инқирозга қарши курашиш жамғармаси маблағларининг мақсадли сарфланиши бўйича ҳудудларда ўрганишлар ўтказилди.
Хусусан, агентлик томонидан Молия вазирлиги Давлат молиявий назорат департаменти ва Монополияга қарши курашиш қўмитаси билан ҳамкорликда Самарқанд вилоят соғлиқни сақлаш бошқармаси ва унинг қуйи тизимларида бюджет маблағлари, давлат активларини реализация қилиш ва давлат харидлари соҳасида қонун ҳужжатларига риоя этиш ҳолати бўйича ўрганиш ўтказилган.
Ўрганишларда вилоят соғлиқни сақлаш муассасалари томонидан 9 миллиард 256 миллион сўмлик дори воситаларига муқобил тижорат таклифлари мавжуд бўлгани ҳолда, 14 миллиард 902 миллион сўмга, яъни 5 миллиард 643 миллион сўм қиммат нархларда давлат харидларни амалга оширилгани аниқланган. Шунингдек, давлат харидларини амалга оширишда 4 миллиард 999 миллион сўмлик қийматдаги тендер ва 186 миллион 100 минг сўмлик электрон дўкон шаклидаги харидлар давлат харидларига оид қонун талабларига зид равишда ташкил қилинган.
Бундан ташқари, вилоят соғлиқни сақлаш муассасалари томонидан 2020 йил 9 ойи давомида жами 1 миллиард 384 миллион сўмлик талон-торожлик, молиявий хато ва камчиликларга йўл қўйилган.
Мисол учун, Республика шошилинч тиббий ёрдам илмий маркази Самарқанд филиали томонидан тез тиббий ёрдам бригадаларига жалб қилинмаган ҳамда ишлаётган штат бирлигига нисбатан ортиқча 48 нафар ходимга 124,5 миллион сўм рағбатлантириш учун ортиқча маблағ тўланган.
Ишчи гуруҳ томонидан аниқланган талон-торожлик ва суиистеъмолчиликлар миқдори жами 7 миллиард сўмни ташкил этди.
Ўрганиш якунлари бўйича тўпланган ҳужжатлар Коррупцияга қарши курашиш агентлиги томонидан Бош прокуратурага юборилди.
Мазкур ҳужжатлар асосида Самарқанд вилоят прокуратураси томонидан вилоят соғлиқни сақлаш муассасалари ва вилоят санитария эпидемиологик осойишталик маркази мансабдор шахсларига нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш), 205-моддаси 2-қисми «а» банди (жуда кўп миқдорда зарар етказган ҳолда ҳокимият ёки мансаб ваколатини суиистеъмол қилиш) билан жиноят иши қўзғатилиб тергов ҳаракатлари олиб борилмоқда.
Аввалроқ самарқандлик мансабдорлар икки йил давомида давлатга 25,3 миллиард сўм зарар келтиргани, Самарқандда давлатга салкам 56 миллиард сўм зарар етказган кадастр корхонаси мансабдорлари устидан жиноят иши очилгани ҳамда халқ таълими тизимида 70 миллиард сўмлик ўғрилик ва ўзлаштириш ҳолатлари аниқлангани ҳақида хабар берилганди.
Изоҳ (0)