Qashqadaryo viloyatining Qarshi shahridagi Otchopar mahallasida joylashgan uylarning birida gaz-havo aralashmasining chaqnashi oqibatida portlash sodir bo‘lib, uy devorlari qulab tushgani va portlash oqibatlari tasvirlagan fotoreportaj taqdim etilgandi.
“Daryo” muxbiri voqea joyida bo‘lib, mahalla aholisi bilan suhbatlashdi.
“Ertalab soat sakkizga yaqin uyda o‘tirgandim, qattiq gumburlagan ovoz eshitildi. Gumburlagan ovoz sabab uyimiz eshiklari qarsillab, ochilib ketdi. Men issiqda birorta ariston portladimi deb o‘yladim. Keyin ko‘chaga chiqdim. Portlash bo‘lgan tomonga e’tibor qaratmagan ekanman. Keyin mashinalar kelgach sinchiklab qaradim va voqea joyini ko‘rdim”, — deydi ushbu mahallada yashovchi Ziyovuddin Ziyodullayev.
Ziyovuddin Ziyodullayevning aytishicha, ushbu namunali uylarning aksariyatida aholi istiqomat qilgan.
“‘Otchopar’ mahalla fuqarolar yig‘inida joylashgan xonadonlarning birida 6-yanvar kuni soat taxminan 08:10 da gaz-havo aralashmasining chaqnashi sabab portlash yuz berdi. Mazkur voqea isitish tizimidagi muammo sabab yuzaga kelgan deb taxmin qilinmoqda. Voqea joyiga yetib kelgan Favqulodda vaziyatlar boshqarmasining qutqaruv guruhi xonadondan ikki nafar marhumning jasadini olib chiqdi”, — deydi viloyat Favqulodda vaziyatlar boshqarmasi axborot xizmati rahbari Sohib Vaitov.
“Daryo” muxbiri bilan suhbatlashgan qo‘shnilarning ma’lumot berishicha, gumburlagan ovoz ertalab soat sakkizda eshitilgan.
“Ertalab soat sakkizlarda uxlayotgandik, gumburlagan ovoz eshitildi. Chopib tashqariga chiqsak, chang ko‘tarilgan ekan. Yordam qilamiz degandik, keyin Favqulodda vaziyatlar boshqarmasidan odamlar kelishdi va qutqarish ishlarini olib borishdi”, — deydi qo‘shni xonadonda yashovchi Aslan Tuyg‘unov.
Mahalliy aholining ma’lumot berishicha, 2017-yil foydalanishga topshirilgan namunali uylarning aksariyatida aholi istiqomat qilib keladi. Voqea sodir bo‘lgan xonadon sohiblari esa hali uyiga ko‘chib kirmagan bo‘lgan.
“Ertalab uxlab yotgandim, bang etgan ovozdan uyg‘onib ketdim. Turib, soatga qarasam 08:07 daqiqa o‘tgan ekan. Keyinroq voqea haqida eshitdim”, — deydi voqea sodir bo‘lgan xonadonga yaqin uylarda yashovchi Avazbek Ahadov.
“Otchopar” MFY raisi Farmon Chorshanbiyev OAV savollariga javob berishdan bosh tortib, voqea joyidan qochib ketdi.
Eslatib o‘tamiz, 6-yanvar, chorshanba kuni soat 8:10 da sodir bo‘lgan portlash oqibatida xonadon egasining 16 yoshli o‘g‘li va 14 yoshli jiyani vafot etgani xabar berilgandi. Hodisa joyiga viloyat FVB, IIB, SSB va prokuratura organlari xodimlari yetib kelib, dastlabki tergovoldi surishtiruv ishlarini olib borgan.
Izoh (0)