Sergeli yer usti metro yo‘nalishi ishga tushgani munosabati bilan Toshkentda 8, 32, 38, 80,131, 132, 133-sonli avtobuslar yo‘nalishi 2021-yil 11-yanvardan maqbullashtirilishi ma’lum qilingandi. “Toshshahartransxizmat” ushbu muvofiqlashtirish bo‘yicha batafsil ma’lumot berdi.
“Toshshahartransxizmat” tomonidan ishlab chiqilgan rejaga muvofiq, Sergeli 7-dahasidan Chilonzor 25-dahaga qatnovchi 8-sonli, Sergeli 7-dahadan Gulobod ko‘chasiga qatnovchi 132-sonli avtobus yo‘nalishlarini yopish, 32, 80, 131, 133-sonli avtobus yo‘nalishlari harakatini qisqartirish, 38-sonli avtobus yo‘nalishi harakatini esa uzaytirish belgilangan edi.
Xabarda aytilishicha, yuqorida keltirilgan 7 ta avtobus yo‘nalishlari faoliyatini muvofiqlashtirish ishlari natijasida Sergeli, Yangi hayot va Chilonzor tumanlarida yo‘lovchilar tashish uzluksizligini ta’minlash, harakati qisqarayotgan avtobus yo‘nalishlarining o‘rniga muqobil yo‘nalishlarni shakllantirish hamda yo‘nalishlardan bo‘shagan 25 ta (shundan 18 ta katta sig‘imli va 7 ta kichik sig‘imli) avtobuslardan samarali foydalanish, yo‘lovchilar oqimi ko‘p bo‘lgan va avtobuslar soni yetishmayotgan yo‘nalishlarni harakat tarkibi bilan to‘ldirish maqsadida qo‘shimcha tadbirlar amalga oshiriladi.
Xususan:
131-sonli “Do‘stlik 2-mavzesi—Olimpiya mavzesi” avtobus yo‘nalishida xizmat ko‘rsatish huquqi “12-avtobus saroyi” MChJdan “4-avtobus saroyi” MChJga o‘tkaziladi. Ushbu yo‘nalish harakati “Do‘stlik 2-mavzesi”dan “Janubiy vokzal” avtoshohbekatigacha qisqarayotganligi munosabati bilan yo‘nalishdagi jadvallar soni 12 ta etib belgilanadi. 8-sonli avtobus yo‘nalishi yopilishi hisobiga bo‘shagan 12 ta Mercedes Benz rusumli avtobuslar “4-avtobus saroyi” MChJ tomonidan 131-sonli yo‘nalishda tasarruf etiladi;
62-sonli “Do‘stlik 2-mavzesi—M.Yusuf ko‘chasi” avtobus yo‘nalishidagi harakat tarkibi 8 ta SAZ LE-60 rusumli o‘rta sig‘imli avtobuslardan 10 tasi MAN A22 rusumli katta sig‘imli avtobuslarga o‘zgartiriladi hamda yo‘nalishda harakatlanadigan avtobuslarning soni 8 tadan 10 taga (+2 ta) ko‘paytiriladi;
47-sonli “Do‘stlik 2-mavzesi—Gulobod ko‘chasi” avtobus yo‘nalishida harakatlanadigan avtobuslarning soni 8 tadan 12 taga (+4 ta katta sig‘imli avtobuslarga) oshiriladi;
58-sonli “Do‘stlik 2-mavzesi—Ekskavator zavodi” avtobus yo‘nalishida harakatlanadigan avtobuslarning soni 16 tadan 18 tagacha (+2 ta katta sig‘imli avtobuslarga) yetkaziladi;
40-sonli “Sergeli 12-dahasi—Toshkent vokzali” avtobus yo‘nalishida harakatlanadigan avtobuslarning soni 8 tadan 10 taga (+2 ta katta sig‘imli avtobuslarga) ko‘paytiriladi;
48-sonli “Novator ICHB—Al-Xorazmiy mavzesi” avtobus yo‘nalishidagi harakat tarkibi 4 ta Isuzu rusumli kichik sig‘imli avtobuslardan 8 ta SAZ LE-60 rusumli o‘rta sig‘imli avtobuslarga o‘zgartiriladi. Yo‘nalishda harakatlanadigan avtobuslar sonini 4 tadan 8 taga oshirishga erishiladi;
48-sonli avtobus yo‘nalishidan bo‘shagan 4 ta Isuzu rusumli avtobus belgilangan jadvallar sonini to‘ldirish uchun avtobuslar soni yetishmayotgan 66-sonli “Sergeli Sputnik 17-dahasi—Toshkent vokzali”, 184-sonli “Binokor qo‘rg‘oni—Qipchoq avtoshohbekati” avtobus yo‘nalishlariga biriktiriladi. 66-sonli yo‘nalishga 2 ta, 184-sonli yo‘nalishga 2 ta Isuzu rusumli avtobuslar biriktiriladi. 40, 47, 48, 58, 62-sonli avtobus yo‘nalishlaridagi avtobuslar sonining jami 14 taga ko‘paytirilishi “Do‘stlik 2-mavzesi—Janubiy vokzal” manzillari oralig‘ida harakati qisqarayotgan 131-sonli yo‘nalishga muqobil yo‘nalishlarni shakllantirish imkoniyatini beradi;
135-sonli “Nazarbek qo‘rg‘oni—To‘qimachilik kombinati” avtobus yo‘nalishida harakatlanadigan avtobuslarning soni 7 tadan 10 taga (+3 ta kichik sig‘imli avtobuslarga) qo‘shiladi;
32-sonli “Erkin qo‘rg‘oni—Gulobod ko‘chasi” avtobus yo‘nalishida harakatlanadigan avtobuslarning soni 8 tadan 10 taga (+2 ta kichik sig‘imli avtobuslarga) ko‘paytiriladi.
Shuningdek, yo‘lovchilar tomonidan Sergeli va Yangihayot tumanlari hududidan Chilonzor tumanidagi bekatlargacha yetib olish uchun jamoat transportlarida — metropolitenda (5-bekatdan—Chilonzor bekatigacha)—15 daqiqa, avtobusda (Do‘stlik va Sergeli yarmarka bekatlaridan)—35-50 daqiqani tashkil etishi maqsad qilingan.
Qayd etilishicha, aholining metropoliten xizmatidan foydalanishga o‘tishi natijasida ularning jamoat transportlaridagi qatnov vaqtlari 70 foizgacha tejaladi.
Izoh (0)