Samarqandlik mansabdorlar ikki yil davomida davlatga 25,3 mlrd so‘m zarar keltirgani ma’lum bo‘ldi

Samarqand viloyatida 2019-yil va 2020-yilning o‘tgan davri mobaynida 246 nafar mansabdor turli ko‘rinishdagi korrupsion jinoyatlari uchun javobgarlikka tortilgan. Bu haqda Xalq deputatlari Samarqand viloyati Kengashining o‘n sakkizinchi sessiyasida viloyat prokurori Ravshan Masharipov ma’lum qilgan.

Viloyat prokurorining aytishicha, mazkur jinoyatlar oqibatida yetkazilgan moddiy zarar miqdori 25,3 milliard so‘mdan oshgan.

Prokurorning aniqlik kiritishicha, mazkur jinoyatlarning 19 tasi bank, 17 tasi oliy ta’lim, 15 tasi xalq ta’limi, 33 tasi sog‘liqni saqlash, 20 tasi maktabgacha ta’lim, 4 tasi soliq, 21 tasi IIB, 8 tasi MIB, 3 tasi sud sohasi hamda 58 tasi boshqa korxona, tashkilot xodimlari tomonidan sodir etilgan.

Xususan, 2020-yilning o‘tgan davri mobaynida bir nafar hokim o‘rinbosari, viloyat qurilish bosh boshqarmasi boshlig‘i o‘rinbosari, kapital qurilish direksiyasi sobiq boshlig‘i, kadastr idorasining 4 nafar mansabdor va 10 nafar boshqa mas’ul xodimi jinoiy javobgarlikka tortilgan.

Misol uchun “Afrosiyob Stroy Servis” MChJ rahbari Kamoliddin Shukurov, Samarqand shahar hokimining sobiq o‘rinbosari Bobur Elmurodov, Kapital qurilish direksiyasi sobiq boshlig‘i Temur Xoliqulov va boshqalar o‘zaro jinoiy til biriktirib, shahar hokimligi mansabdor shaxslarining ixtiyorida bo‘lgan 7,5 milliard so‘mlik juda ko‘p miqdordagi pul mablag‘larini o‘zlashtirish va rastrata qilish yo‘li bilan talon-toroj qilib yuborgan.

Shuningdek, “Qorakissa nurli qurilish” MChJ ish boshqaruvchisi Hoshimov, Qo‘shrabot tumani xalq ta’limi bo‘limi mudiri Shakarov va boshqalar bilan 3 ta maktabning hojatxonalarini ta’mirlash uchun ajratilgan 160 million so‘m budjet mablag‘larini o‘zlashtirish yo‘li bilan talon-toroj qilgan.