Navoiyda o‘quvchilarni fan olimpiadasiga olib ketayotgan Nexia avariyaga uchradi. Bir o‘qituvchi va o‘quvchi vafot etgan

Navoiyda fan olimpiadasiga ikki o‘quvchi va ikki o‘qituvchini olib ketayotgan Nexia avariyaga uchradi, deb xabar beradi “Kun.uz”.

Ma’lum qilinishicha, 5-yanvar kuni Navoiy shahrida maktab o‘quvchilari o‘rtasida fan olimpiadasining viloyat bosqichi boshlangan. Nurota tumanidan mazkur olimpiadaga ikki o‘quvchi va ikki o‘qituvchini olib kelayotgan Nexia avtomashinasi yo‘lda avariyaga uchragan.

Nurota tumani xalq ta’limi bo‘limi mudiri Bayramali Bobonazarovning so‘zlariga ko‘ra, yo‘l-transport hodisasiga uchragan fuqarolar tumandagi 2-maktabning o‘qituvchi va o‘quvchilari bo‘lgan.

Mashina “Qoraqarg‘a” dovonidan o‘tayotganda yo‘ldan chiqib ketgan. Oqibatda bir nafar o‘qituvchi va bir nafar o‘quvchi voqea joyida vafot etgan.

Dastlabki ma’lumotlarga ko‘ra, hodisaga haydovchi tezlikni oshirgani sabab bo‘lishi mumkin.

Avvalroq Namanganda 4 nafar o‘smir sayr qilib kelish bahonasida Spark’ni olib qochib, YTHga uchragani, Ellikqal’ada Cobalt va Spark ishtirokida yuz bergan avariyada to‘rt kishi halok bo‘lgan bo‘lishi mumkinligi to‘g‘risida xabar berilgandi.