Korrupsiyaga qarshi kurashish Milliy kengashi tomonidan Korrupsiyaga qarshi kurashish xalqaro standartlarini qonunchilikka implementatsiya qilishni davom ettirish bo‘yicha yo‘l xaritasi tasdiqlandi. Bu haqda agentlik matbuot xizmati xabar berdi.
Yo‘l xaritasi Prezidentning “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi farmoniga asosan agentlik, bosh prokuratura hamda tegishli vazirlik va idoralar bilan birgalikda ishlab chiqilgan.
Unga muvofiq, xalqaro tashkilotlar tomonidan ajratilgan qarzlar va moliyaviy yordamlar sarfining oshkoraligini ta’minlash uchun ochiq ma’lumotlar bazasi shakllantiriladi.
Shuningdek, “Davlat fuqarolik xizmati to‘g‘risida”gi qonunni qabul qilish jarayonini tezlashtirish, davlat fuqarolik xizmatiga ochiq mustaqil tanlov asosida ishga qabul qilish hamda ularning kasbga oid fazilatlari va alohida xizmatlari (meritokratiya tamoyili) asosida xizmat pog‘onalarida ko‘tarilishining shaffof mexanizmlarini joriy etish ham ko‘zda tutilgan.
Ma’lumot uchun, O‘zbekistonning umumiy tashqi qarzi 2020-yilning 10 oyida 18 foizga o‘sib, 1-oktabr holatiga 29,3 milliard dollarni tashkil etgandi. Mamlakat qarzining 2021-yildagi umumiy chegarasi YaIMga nisbatan 60 foizga yetmasligi nazarda tutilgan bo‘lib, kelgusi yilda 5,5 milliard dollar miqdorida qarz mablag‘larini jalb qilish rejalashtirilgan.
Moliya vaziri Timur Ishmetov O‘zbekistonning tashqi qarzi miqdori xalqaro me’yorlarga nisbatan past ekanligini bildirgan.
Izoh (0)