Toshkent shahrida yo‘nalishlar tarmog‘ini maqbullashtirish ishlari amalga oshirilmoqda. Bu haqda poytaxt Transport boshqarmasiga tayanib, “Toshshahartransxizmat” matbuot xizmati xabar berdi.
Ma’lum qilinishicha, 2020-yil 27-dekabr sanasidan Toshkent metropoliteni Chilonzor yo‘nalishining davomi — 5 ta bekatdan iborat Sergeli yer usti metro yo‘nalishi ishga tushirilishi munosabati bilan 2021-yil 11-yanvar sanasidan 8, 32, 38, 80,131, 132, 133-sonli avtobus yo‘nalishlari maqbullashtiriladi.
Xususan, Sergeli 7-mavze—Chilonzor 25-daha yo‘nalishi bo‘yicha qatnagan 8-sonli avtobus yo‘nalishi yopilayotgan bo‘lsa, Sergeli 7-mavzedan “O‘zbekqishloqmash” zavodi yo‘nalishi bo‘yicha qatnagan 38-sonli avtobus yo‘nalishi harakati uzaytirilmoqda.
Bu Vazirlar Mahkamasining 2020-yil 16-martdagi “Toshkent shahar yo‘lovchi transporti tizimini takomillashtirish chora-tadbirlari to‘g‘risida”gi 157-sonli qaroriga asosan avtobus yo‘nalishlarining o‘zaro harakat yo‘nalishini takrorlashini kamaytirish maqsadida amalga oshirilmoqda, deyiladi xabarda.
Avvalroq Toshkentdagi ikki avtobus saroyini viloyatga ko‘chirish rejalashtirilayotgani to‘g‘risida xabar berilgandi.
Izoh (0)