Қашқадарё вилоятининг Қарши шаҳридаги Отчопар маҳалласида жойлашган уйларнинг бирида газ-ҳаво аралашмасининг чақнаши оқибатида портлаш содир бўлиб, уй деворлари қулаб тушгани ва портлаш оқибатлари тасвирлаган фоторепортаж тақдим этилганди.
«Дарё» мухбири воқеа жойида бўлиб, маҳалла аҳолиси билан суҳбатлашди.
«Эрталаб соат саккизга яқин уйда ўтиргандим, қаттиқ гумбурлаган овоз эшитилди. Гумбурлаган овоз сабаб уйимиз эшиклари қарсиллаб, очилиб кетди. Мен иссиқда бирорта аристон портладими деб ўйладим. Кейин кўчага чиқдим. Портлаш бўлган томонга эътибор қаратмаган эканман. Кейин машиналар келгач синчиклаб қарадим ва воқеа жойини кўрдим», — дейди ушбу маҳаллада яшовчи Зиёвуддин Зиёдуллаев.
Зиёвуддин Зиёдуллаевнинг айтишича, ушбу намунали уйларнинг аксариятида аҳоли истиқомат қилган.
«‘Отчопар’ маҳалла фуқаролар йиғинида жойлашган хонадонларнинг бирида 6 январь куни соат тахминан 08:10 да газ-ҳаво аралашмасининг чақнаши сабаб портлаш юз берди. Мазкур воқеа иситиш тизимидаги муаммо сабаб юзага келган деб тахмин қилинмоқда. Воқеа жойига етиб келган Фавқулодда вазиятлар бошқармасининг қутқарув гуруҳи хонадондан икки нафар марҳумнинг жасадини олиб чиқди», — дейди вилоят Фавқулодда вазиятлар бошқармаси ахборот хизмати раҳбари Соҳиб Ваитов.
«Дарё» мухбири билан суҳбатлашган қўшниларнинг маълумот беришича, гумбурлаган овоз эрталаб соат саккизда эшитилган.
«Эрталаб соат саккизларда ухлаётгандик, гумбурлаган овоз эшитилди. Чопиб ташқарига чиқсак, чанг кўтарилган экан. Ёрдам қиламиз дегандик, кейин Фавқулодда вазиятлар бошқармасидан одамлар келишди ва қутқариш ишларини олиб боришди», — дейди қўшни хонадонда яшовчи Аслан Туйғунов.
Маҳаллий аҳолининг маълумот беришича, 2017 йил фойдаланишга топширилган намунали уйларнинг аксариятида аҳоли истиқомат қилиб келади. Воқеа содир бўлган хонадон соҳиблари эса ҳали уйига кўчиб кирмаган бўлган.
«Эрталаб ухлаб ётгандим, банг этган овоздан уйғониб кетдим. Туриб, соатга қарасам 08:07 дақиқа ўтган экан. Кейинроқ воқеа ҳақида эшитдим», — дейди воқеа содир бўлган хонадонга яқин уйларда яшовчи Авазбек Аҳадов.
«Отчопар» МФЙ раиси Фармон Чоршанбиев ОАВ саволларига жавоб беришдан бош тортиб, воқеа жойидан қочиб кетди.
Эслатиб ўтамиз, 6 январь, чоршанба куни соат 8:10 да содир бўлган портлаш оқибатида хонадон эгасининг 16 ёшли ўғли ва 14 ёшли жияни вафот этгани хабар берилганди. Ҳодиса жойига вилоят ФВБ, ИИБ, ССБ ва прокуратура органлари ходимлари етиб келиб, дастлабки терговолди суриштирув ишларини олиб борган.
Изоҳ (0)