Davlat bojxona qo‘mitasining Kontrabandaga qarshi kurashish va bojxona auditi bosh boshqarmasi tomonidan Andijon viloyatida o‘tkazilgan tezkor tadbir davomida dori vositalari va tibbiy buyumlarning yashirincha saqlanayotgani aniqlandi. Bu haqda qo‘mita matbuot xizmati xabar berdi.
Oldindan olingan tezkor ma’lumotlar asosida Andijon tumanidagi bir-biriga qo‘shni bo‘lgan 2 ta uy belgilangan tartibda va xolislar ishtirokida ko‘zdan kechirilgan. Tekshiruv davomida har ikkala xonadonda 6 turdagi 3800 donadan ortiq dori vositasi va 10 ming dona leykoplaster tibbiy buyumlari borligi aniqlangan.
Xorijda ishlab chiqarilgan, ammo sifatini va bojxona rasmiylashtiruvini tasdiqlovchi hujjatlari bo‘lmagan mazkur tovarlarning umumiy qiymati salkam 1 milliard 300 million so‘mni tashkil qilmoqda.
Hozirda holat yuzasidan bojxona organlari tomonidan surishtiruv harakatlari davom ettirilmoqda.
Avvalroq Andijon viloyatida 738 million so‘mlik pirotexnika va “Tropikamid” preparati musodara qilingani haqida xabar berilgan edi.
Izoh (0)