Surxondaryo viloyati hokimligi Clone Security xakerlar guruhining AKT xodimi boshqarma boshlig‘i tomonidan kaltaklangani to‘g‘risida tarqatgan ma’lumotlarini rad etdi

Surxondaryoda viloyat, shahar va tumanlarning rasmiy saytlari (jami 11 ta sayt) 6-yanvar kuni xakerlar hujumiga uchragani va hujumni Clone Security guruhi o‘z zimmasiga olgani to‘g‘risida xabar berilgandi. Viloyat hokimligi matbuot xizmati ushbu holatga munosabat bildirib, xabarda qayd etilganidek AKT bo‘limida ishlaydigan xodim boshqarma boshlig‘i tomonidan kaltaklangani to‘g‘risidagi ma’lumotlarni rad etdi.

Hozirda saytlarni asl holida ishlatish choralari ko‘rilayotgan bir paytda ayrim internet nashrlarida viloyat hokimligi huzuridagi “Axborot kommunikatsiya texnologiyalarini rivojlantirish markazi” DUKda ishlab ketgan xodimlardan birining hokimlik ishlar boshqaruvchisi tomonidan o‘z ish kabinetida o‘zaro kelishmovchilik sabab kaltaklangani, viloyat hududidan chiqib ketish sharti qo‘yilgani, shuningdek, xodim Prezident virtual qabulxonasiga qilgan murojaati uchun rasman ishdan olingani haqida xabarlar tarqalmoqda.

Surxondaryo viloyati hokimligi xabarlarda keltirilayotgan mazkur holatlarni rad etib, sizlardan aholi orasida turli mish-mishlar paydo bo‘lishiga, ularda salbiy fikr va ishonchsizlikni shakllantirishga olib keladigan ushbu mazmundagi yolg‘on ma’lumotlarga ishonmaslikni so‘raydi.

Surxondaryo viloyati hokimligi matbuot xizmati

Eslatib o‘tamiz, 2013-yilning iyunida Clone Security xakerlar guruhi O‘zbekiston futbol federatsiyasining rasmiy saytiga ham hujum uyushtirgandi. O‘shanda federatsiya sayti, Twitter’dagi barcha akkauntlari va elektron pochta manzillari xakerlar tomonidan buzilgan. Undan avvalroq esa Clone Security O‘zMTRK saytini ham buzib kirgan edi.