“Ta’lim xarajatlari o‘zbek talabalarida stress va chorasizlik hissini uyg‘otmoqda” — YuNISEF

YuNISEF tashkiloti “Yuksalish” umummilliy harakati va Yoshlar ittifoqi hamkorligida tayyorlangan “O‘zbekiston yoshlari: chaqiriqlar va istiqbollar” mavzusidagi hisobotini e’lon qildi.

Ta’kidlanishicha, respublika bo‘yicha 14—30 yosh oralig‘idagi 4458 nafar respondent orasida o‘tkazilgan so‘rov hisobot xulosalari uchun asos bo‘lib xizmat qilgan.

“O‘zbekistonda bolalar va 30 yoshgacha bo‘lganlar aholining 60 foizini tashkil qiladi. 15—20 yildan keyin ular mamlakat tarixida eng katta hajmdagi ishchi kuchini hosil qiladi. Shu bois bolalar va yoshlar masalalari O‘zbekiston uchun ustuvor ahamiyatga ega”, — deyiladi hisobotda.

O‘tkazilgan so‘rov xulosalariga ko‘ra, O‘zbekiston bo‘ylab tahsil oluvchilar umumiy hisobda ta’lim infratuzilmasidan (o‘quv materiallari, ta’lim muassasalaridagi muhit) qoniqishini bildirgan bo‘lsa-da, qishloq hududlarida shaharga nisbatan ahvol yomonroqligini aytgan.

Shuningdek, talabalar o‘quv tizimi ko‘proq motivatsiya uyg‘ota oluvchi, amaliyotga yo‘naltirilgan bo‘lishini, til ko‘nikmalari ish savodxonligini oshirishni xohlashlarini aytgan.

Qayd etilishicha, uy va oila yumushlari, yangi iqtisodiy imkoniyatlar izlashda mobillikning pastligi yosh ayollarning shaxsiy daromadiga ega bo‘lishiga to‘sqinlik qiladi. 19—30 yoshlilar orasida ta’limni, kasbiy tayyorgarlikni davom ettirmaydiganlar va ishlamaydiganlar ulushi 54,6 foizini tashkil qiladi. Bu borada ayollarning ulushi sezilarli darajada ko‘p — 74 foiz.

Mamlakat yoshlarining kompyuterni o‘rganishga qiziqishi yuqori bo‘lsa-da (86,9 foiz), kompyuterda umuman ishlay olmaydigan yoshlar — asosan ayollar va qishloq hududida yashovchilar qatlami ham (37,8 foiz) mavjud.

“Yoshlar isloh qilinishi zarur bo‘lgan sohalar qatorida sifatli ta’lim, kasbiy tayyorgarlik, yoshlar orasidagi ishsizlik va daromadlar pastligi bilan samarali kurash, erta turmush, ajrimlar, katta va yosh avlod o‘rtasidagi ziddiyat kabi ijtimoiy muammolarni ko‘rsatadi. Yosh avlodning aksariyati siyosiy yangiliklarga qiziqish ko‘rsatib, o‘z fikrini erkin ifodalay olishini bildirsa-da, juda kamchilik yoshlar jamoat va siyosiy tashkilotlar faoliyatida ishtirok etadi”, — deyiladi hisobotda.

Avvalroq YuNISEF O‘zbekistonda imkoniyati cheklanganlar bilan bog‘liq qonunchilik xalqaro talablarga to‘la mos kelmasligini ma’lum qilgandi. Shuningdek, O‘zbekistonda bolalar huquqlari borasida erishilgan yutuqlar pandemiya sabab yo‘qqa chiqishi mumkinligi haqida ogohlantirgandi.