O‘zbekistonda g‘ayrioddiy tabiat hodisasi kuzatilmoqda

So‘nggi kunlarda O‘zbekiston aholisi g‘ayrioddiy hodisani kuzatishi mumkin — qor donalari xuddi tumandan tushgandek yog‘adi. “Gazeta.uz” bu hodisa yuzasidan “O‘zgidromet”dan izoh oldi.

Ma’lum qilinishicha, bu hodisa O‘zbekistonda nihoyatda kam uchraydi, ko‘pincha u qishi barqaror sovuq hududlarda kuzatiladi. Ushbu hodisaning vujudga kelishi sovuq Sibir antitsiklonining ta’siri bilan bog‘liq. Odatda, bunday sinoptik vaziyatda yog‘ingarchilik kuzatilmaydi.

“Biroq yer sirtidagi havo qatlamining tunda kuchli sovishi tufayli, harorat inversiyasi yuzaga keladi, ya’ni pastki havo qatlamlari yuqoridagiga qaraganda sovuqroq bo‘ladi. Natijada konveksiyaga to‘sqinlik qiluvchi ‘yopib qo‘yuvchi’ qatlam hosil bo‘ladi. Bunday holatda muttasil ravishda ishlaydigan qozonxonalar quvurlaridan havoga chiqariladigan ko‘p miqdordagi iliq bug‘ xuddi shu qatlamga ‘urilib’, kondesatsiyalanib (quyuqlashib, zichlashib) qor donalari shaklida yerga tushadi”, — deb qayd etgan “O‘zgidromet”.

Ushbu hodisani o‘rgangan ayrim tadqiqotchilar buni “texnogen qor” deb ataydi. Ammo “O‘zgidromet”ning bildirishicha, bu unchalik ham to‘g‘ri emas: “Bu antropogen omil ta’sirida o‘zgargan tabiat hodisasidir”.

Eslatib o‘tamiz, “O‘zgidromet” mamlakatda hafta davomida anomal sovuq bo‘lishi kutilayotganini ma’lum qilgan.