M39 Toshkent—Termiz avtomobil yo‘lining umumiy hisobda 21 kilometrini rekonstruksiya qilishga 40,7 million dollar mablag‘ yo‘naltiriladi. Bu haqda Vazirlar Mahkamasining 2020-yil 31-dekabrdagi qarorida so‘z boradi.
Mazkur avtomobil yo‘lining 1395—1400-kilometrlari va 1410—1426-kilometr oralig‘idagi qismlarining rekonstruksiyasi Islom taraqqiyot bankining 35,1 million dollar miqdoridagi 20 yil muddatga ajratilgan qarzi hisobiga amalga oshiriladi. Qolgan 5,5 million dollarni O‘zbekiston soliq imtiyozlarini berish shaklida ajratadi.
Hujjatga ko‘ra, Islom taraqqiyot bankining qarzini qaytarish, jumladan, foizlarini to‘lash, vositachilik to‘lovlari va boshqa xarajatlar bilan bog‘liq to‘lovlar O‘zbekiston budjeti mablag‘lari hisobidan amalga oshiriladi.
Avvalroq Islom taraqqiyot banki Toshkent—Termiz avtomobil yo‘lining 100 kilometrini rekonstruksiya qilish ishlarida qatnashgan edi. Loyiha 167,2 million dollarga baholangandi. Pudratchi sifatida Ozarbayjonning Akkord Industry Construction Investment Corporation kompaniyasi ishtirok etgan.
Izoh (0)