Toshkentning Mirzo Ulug‘bek tumanidagi Parkent ko‘chasidan Mustaqillik ko‘chasiga o‘tish yo‘li yana ochilmoqda. Bu haqda IIV YHXBB axborot xizmati xabar berdi.
Idora ma’lumotlariga ko‘ra, ushbu yo‘lda, shuningdek, piyodalar va velosipedchilar harakati uchun alohida yo‘laklar tashkil etiladi.
Uzoq yillar davomida yopiq bo‘lgan poytaxtdagi ayrim ko‘chalar Shavkat Mirziyoyev prezident etib saylanganidan keyin ochilishni boshladi. 2015-yilning avgustida Oqqo‘rg‘on ko‘chasidan Mustaqillik tomon eltuvchi Parkent hamda “Buyuk ipak yo‘li” metro bekati yo‘llari temir panjaralar bilan to‘liq yopilgandi. O‘shanda sobiq Pushkin skveridan qayrilib olish yopilgan va Parkent bozori tomon harakatlanish taqiqlangan edi.
Eslatib o‘tamiz, 2020-yilning 6-yanvarida Toshkent shahridagi Mustaqillik shoh ko‘chasidan chap tomonga — Oqqo‘rg‘on ko‘chasiga (shahar markazidan harakatlanganda) burilish yo‘li ochilgan edi.
Izoh (0)