O‘zbekistonga 2020-yilning 25-dekabrdan 2021-yilning 4-yanvar kuniga qadar qabul qilingan 14 ming 700 nafar aviayo‘lovchidan 34 nafarida koronavirus infeksiyasi aniqlangan. Bu haqda “O‘zbekiston24” teleradiokanalida ma’lum qilindi.
Ko‘rsatuv davomida shifokor Gulchehra Sobirova aviareysdan kelayotgan yo‘lovchilardan olingan ekspress test natijasi musbat chiqsa, bunday yo‘lovchilar tez yordam orqali Toshkent viloyati Zangiota tumanidagi maxsus shifoxonaga yuborilayotganini aytib o‘tdi.
“2020-yil 25-dekabrdan shu kungacha 14 ming 700 nafar aviayo‘lovchini qabul qilganmiz. Shulardan 34 nafarida musbat natija chiqqan. Mana shu musbat chiqqan aviayo‘lovchilarni tez yordam orqali shifoxonaga gospitalizatsiya qilingan”, — dedi Gulchehra Sobirova.Eslatib o‘tamiz, 2020-yil 25-dekabrdan boshlab O‘zbekistonga koronavirus kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasi qaroriga muvofiq, mamlakatga kirib kelayotgan barcha shaxslarning o‘z hisobidan chegara punkti hududida koronavirus antigenini aniqlash uchun ekspress test olish tartibi joriy qilingandi.
Ma’lumot uchun, Toshkent xalqaro aeroportida ekspress test olish jarayonlarini ikki tomonlama imzolangan shartnomaga asosan “Tibbiyot dunyosi” MChJ amalga oshirmoqda. Ekspress test narxlari mazkur tashkilot o‘rnatgan ta’riflarga binoan 25—28-dekabrga qadar 150 ming so‘mdan, 28-dekabrdan to bugungacha 95 ming so‘m, talabalar uchun 50 ming so‘m miqdorida belgilangan.
Maxsus komissiya ko‘rsatmasiga ko‘ra, aeroportdan uchib ketish vaqtida PZR testi olinadi, O‘zbekistonga uchib kelinganda ekspress test olinadi. Tahlil natijalari 10 daqiqa mobaynida pasportlarga shtrix kodlarini qo‘yish orqali ma’lum qilinadi.
Virus aniqlangan holatda SES mutaxassislari tomonidan fuqarolar tegishli hududda joylashgan koronavirus infeksiyasini davolashga ixtisoslashgan muassasalarga joylashtiriladi yoki uy sharoitida davolanishga yo‘naltiriladi.
Shuningdek, O‘zbekistonga koronavirus va yangi shtammining kirib kelishi hamda tarqalishining oldini olish yuzasidan ko‘rilayotgan ushbu chora-tadbirlarda PZR testining manfiy natijasi to‘g‘risida yo‘lovchilarda tahlil natijalari mavjudligidan qat’i nazar ulardan tegishli tartibda majburiy ekspress test olinishi belgilab qo‘yildi.
Ko‘p o‘rinli samolyotlar (jumladan, 260 o‘rinli havo kemasi)dagi yo‘lovchilarni kutib olishda tirbandlikning oldini olish maqsadida yo‘lovchilar oqimini terminalning 3 ta joyidagi test olish tibbiyot qismlariga yo‘naltirish tashkil qilingan.
Fuqarolarning parvozdan bir necha kun avvaldan PZR testini topshirish bo‘yicha buyurtma berishlari ham mumkin.
Qayd etilishicha, aeroportning birgina uchib kelish zalida 4 ta bankomat va 2 ta valyuta ayirboshlash shoxobchasi mavjud bo‘lib, ularning muntazam faoliyat olib borishi ta’minlangani sabab pul ayirboshlashda muammo kuzatilmaydi.
Izoh (0)