Kubada ikki xil milliy valyutaning amal qilishi bilan bog‘liq tartibni bartaraf etishga qaratilgan moliya tizimi islohoti boshlandi, deya xabar bermoqda BBC News. Hukumat Kubaning konvertatsiya qilinadigan pesosini muomaladan chiqarishni boshlagan.
Respublikada 1994-yildan beri ikkita valyuta amal qiladi — Kuba pesosi (CUP) va Kuba konvertatsiya pesosi (CUC). Ikkinchi pul birligi Amerika tomonidan sanksiyalar joriy etilgach, mamlakatda aylanmasi to‘xtatilgan AQSh dollarining o‘rnini bosishi lozim edi.
Konvertatsiya qilinadigan peso bilan, masalan, Kubaga kelgan sayyohlar hisob-kitob qilishi mumkin edi. Dollarning Kuba oddiy pesosiga nisbatan kursi taxminan 1:24 nisbatda bo‘lsa, konvertatsiya qilinadigan peso dollarga 1:1 hisoblanardi, e’tiborli tomoni, bu kurs 1950-yillardan beri qariyb o‘zgarmagan. Oqibatda mamlakatda mahsulotlar faqat AQSh dollariga sotiladigan qora bozor yuzaga kelgan.
1-yanvardan boshlab hukumat konvertatsiya qilinadigan pesoni muomaladan chiqarishni boshladi. Endi u aksariyat to‘lovlar uchun qabul qilinmaydi. Bir qator davlat korxonalari ma’lum vaqt aholidan to‘lovlarni bu pulda qabul qilishda davom etadi. Mamlakat fuqarolariga banklardagi o‘z jamg‘armalarini 1:24 nisbatda oddiy pesolarga almashtirib olish uchun 180 kun vaqt berilgan.
Ushbu islohot tufayli mamlakatda transport sohasidan boshlab elektr ta’minotigacha bo‘lgan turli sohalarda mahsulot va xizmatlar narxi oshishi kutilmoqda. Hukumat Kubaning har ikkala valyutasini birlashtirishni ko‘pdan beri rejalashtirar edi, biroq nazorat qilib bo‘lmas giperinflyatsiya ehtimolidan qo‘rqib, bu islohot ortga surib kelinayotgan edi.
Izoh (0)