AQShda COVID-19 pandemiyasi 350 mingdan ortiq kishining umriga zomin bo‘ldi. Bu haqda kasallik tarqalishini real vaqtda kuzatib kelayotgan Jons Hopkins universiteti ma'lumotlari guvohlik bermoqda.
3-yanvar soat 14:00 holatiga ko‘ra, mamlakatda 350 195 ta o‘lim holati qayd etilgan. AQSh koronavirusdan vafot etganlar soni bo‘yicha dunyoda yetakchi davlat bo‘lib qolmoqda.
Eng ko‘p o‘limlar Nyu-York shtatida — 32,2 ming kishi. Ikkinchi o‘rinda bo‘lgan Texasda 28,3 ming kishi vafot etgan. Kaliforniya qurbonlar soni bo‘yicha uchinchi o‘rinda — 26,5 ming kishi.
Bundan bir kun avval AQShda koronavirusga chalinganlar soni 20 million kishidan oshgandi. Yangi kasallanish holatlarining eng ko‘pi Kaliforniya, Texas, Florida va Nyu-Yorkda qayd etilgan.
Dunyoda COVID-19’ga chalinganlar soni bo‘yicha ikkinchi o‘rinda — Hindiston (10,3 milliontadan ortiq), uchinchi o‘rinda — Braziliya (7,7 million). Rossiya esa 3,1 millionta kasallanish holati bilan to‘rtinchi o‘rinda.
AQShda 14-dekabr kuni koronavirusga qarshi emlash boshlandi. Birinchi navbatda kasallanganlar bilan ishlayotgan tibbiyot xodimlari emlanmoqda. Kasalliklar nazorati va profilaktikasi markazlari (CDC) ma’lumotlariga ko‘ra, 2020-yil oxirigacha Amerika hukumati 40 million kishini emlashni rejalashtirmoqda.
Amerikaning Pfizer farmatsevtik giganti bilan birga COVID-19’ga qarshi vaksina yaratgan Germaniyaning BioNTech bioinjiniring kompaniyasi rahbari Ugur Shahin AQShda vaksinatsiya jarayoni normal kechgan holda 2021-yil yozi oxiriga kelib, koronavirus infeksiyasi pandemiyasini nazorat ostiga olishga muvaffaq bo‘lish mumkinligini bildirgan.
Biroq New York Times gazetasi ma’lumotlariga ko‘ra, AQSh aholisini koronavirusga qarshi emlash kampaniyasi logistika muammolari tufayli belgilangan muddatdan ancha orqada qolmoqda.
Dekabr oyining boshlarida olimlar AQShda ommaviy emlashlarga qaramay, 2021-yilning aprel oyiga borib COVID-19 qurbonlari soni 539 ming nafargacha oshishi mumkinligini taxmin qilgandi.
Izoh (0)