Кубада икки хил миллий валютанинг амал қилиши билан боғлиқ тартибни бартараф этишга қаратилган молия тизими ислоҳоти бошланди, дея хабар бермоқда BBC News. Ҳукумат Кубанинг конвертация қилинадиган песосини муомаладан чиқаришни бошлаган.
Республикада 1994 йилдан бери иккита валюта амал қилади — Куба песоси (CUP) ва Куба конвертация песоси (CUC). Иккинчи пул бирлиги Америка томонидан санкциялар жорий этилгач, мамлакатда айланмаси тўхтатилган АҚШ долларининг ўрнини босиши лозим эди.
Конвертация қилинадиган песо билан, масалан, Кубага келган сайёҳлар ҳисоб-китоб қилиши мумкин эди. Долларнинг Куба оддий песосига нисбатан курси тахминан 1:24 нисбатда бўлса, конвертация қилинадиган песо долларга 1:1 ҳисобланарди, эътиборли томони, бу курс 1950 йиллардан бери қарийб ўзгармаган. Оқибатда мамлакатда маҳсулотлар фақат АҚШ долларига сотиладиган қора бозор юзага келган.
1 январдан бошлаб ҳукумат конвертация қилинадиган песони муомаладан чиқаришни бошлади. Энди у аксарият тўловлар учун қабул қилинмайди. Бир қатор давлат корхоналари маълум вақт аҳолидан тўловларни бу пулда қабул қилишда давом этади. Мамлакат фуқароларига банклардаги ўз жамғармаларини 1:24 нисбатда оддий песоларга алмаштириб олиш учун 180 кун вақт берилган.
Ушбу ислоҳот туфайли мамлакатда транспорт соҳасидан бошлаб электр таъминотигача бўлган турли соҳаларда маҳсулот ва хизматлар нархи ошиши кутилмоқда. Ҳукумат Кубанинг ҳар иккала валютасини бирлаштиришни кўпдан бери режалаштирар эди, бироқ назорат қилиб бўлмас гиперинфляция эҳтимолидан қўрқиб, бу ислоҳот ортга суриб келинаётган эди.
Изоҳ (0)