AQShning Viskonsin shtati politsiyasi koronavirusga qarshi vaksina partiyasini qasddan buzgan farmatsevtni hibsga oldi. Bu haqda WBAY telekanaliga tayanib “RBK” xabar bermoqda.
Ma’lum qilinishicha, voqea Miluoki yaqinidagi Grafton shaharchasida sodir bo‘lgan. Aurora Health Care tarmog‘ining sobiq xodimi, taxminan, 500 doza Moderna vaksinasini muzlatgichdan chiqarib, keyinchalik samarasiz bo‘lib qolishini bilgan holda, uni qasddan saqlash xonasi tashqarisida qoldirgan.
Politsiya unga nisbatan qasddan mulkka zarar yetkazish, moddiy zarar yetkazish va fuqarolarning sog‘lig‘iga xavf tug‘diradigan boshqa harakatlar sodir etganlik ayblovi qo‘ygan. Dastlabki ma’lumotlarga ko‘ra, sobiq farmatsevt o‘z harakati bilan 8 mingdan 11 ming dollargacha moddiy zarar yetkazgan.
Dastlab u vaksinani boshqa preparatlarni olayotganda tasodifan muzlatgich tashqarisida qoldirganini aytgan. Keyinchalik preparatni qasddan buzgani va bundan oldin ham bir necha bor shunday qilganini tan olgan.
Hozirda Aurora Health Care samarasiz vaksina qilingan deb taxmin qilinayotgan 57 kishini bu haqda xabardor qilgan. Moderna preparati muzlatgichdan tashqarida 12 soat davomida turishi mumkin, shundan so‘ng u o‘z xususiyatini yo‘qotadi.
Avvalroq, dekabr oyi boshida Nyu-York shtati politsiyasi asosan yahudiy diasporasiga xizmat ko‘rsatadigan mahalliy klinikalar tarmog‘ida tekshiruv boshlagandi. Tibbiyot muassasalari rahbariyati vaksinadan noqonuniy foydalanish, uni jismoniy shaxslarga tarqatish va vakolatli organlar tomonidan tasdiqlangan vaksinatsiya rejasini buzganlikda gumon qilingan.
Avvalroq AQShda COVID-19’ga qarshi vaksina olishdagi firibgarliklar bo‘yicha tekshiruv boshlangani, bunday firibgarliklar uchun 1 million dollar jarima solinishi haqida xabar berilgandi.
Izoh (0)