АҚШнинг Висконсин штати полицияси коронавирусга қарши вакцина партиясини қасддан бузган фармацевтни ҳибсга олди. Бу ҳақда WBAY телеканалига таяниб «РБК» хабар бермоқда.
Маълум қилинишича, воқеа Милуоки яқинидаги Графтон шаҳарчасида содир бўлган. Aurora Health Care тармоғининг собиқ ходими, тахминан, 500 доза Moderna вакцинасини музлатгичдан чиқариб, кейинчалик самарасиз бўлиб қолишини билган ҳолда, уни қасддан сақлаш хонаси ташқарисида қолдирган.
Полиция унга нисбатан қасддан мулкка зарар етказиш, моддий зарар етказиш ва фуқароларнинг соғлиғига хавф туғдирадиган бошқа ҳаракатлар содир этганлик айблови қўйган. Дастлабки маълумотларга кўра, собиқ фармацевт ўз ҳаракати билан 8 мингдан 11 минг долларгача моддий зарар етказган.
Дастлаб у вакцинани бошқа препаратларни олаётганда тасодифан музлатгич ташқарисида қолдирганини айтган. Кейинчалик препаратни қасддан бузгани ва бундан олдин ҳам бир неча бор шундай қилганини тан олган.
Ҳозирда Aurora Health Care самарасиз вакцина қилинган деб тахмин қилинаётган 57 кишини бу ҳақда хабардор қилган. Moderna препарати музлатгичдан ташқарида 12 соат давомида туриши мумкин, шундан сўнг у ўз хусусиятини йўқотади.
Аввалроқ, декабрь ойи бошида Нью-Йорк штати полицияси асосан яҳудий диаспорасига хизмат кўрсатадиган маҳаллий клиникалар тармоғида текширув бошлаганди. Тиббиёт муассасалари раҳбарияти вакцинадан ноқонуний фойдаланиш, уни жисмоний шахсларга тарқатиш ва ваколатли органлар томонидан тасдиқланган вакцинация режасини бузганликда гумон қилинган.
Аввалроқ АҚШда COVID-19’га қарши вакцина олишдаги фирибгарликлар бўйича текширув бошлангани, бундай фирибгарликлар учун 1 миллион доллар жарима солиниши ҳақида хабар берилганди.
Изоҳ (0)