O‘zbekiston Energetika vazirligi Surxondaryoning Sherobod tumanida ikkinchi quyosh fotoelektr stansiyasini qurish loyihasi (Sherobod II) boshlanganini ma’lum qildi.
Yangi loyiha Energetika vazirligi tomonidan O‘zbekiston hukumati va Osiyo taraqqiyot banki o‘rtasida 1 GVt quyosh energiyasi uchun raqobatbardosh savdolar o‘tkazish uchun texnik yordam ko‘rsatish to‘g‘risida umumiy memorandum doirasida amalga oshiriladi.
Sherobod II loyihasi Surxondaryo viloyatining Sherobod tumanida 300 MVt quvvatga ega fotoelektr stansiyasini qurishni ko‘zda tutadi. Mazkur stansiya 2024-yilga qadar ishga tushiriladi. U 2020-yil fevralda e’lon qilingan birinchi Sherobod I loyihasi obyektlariga yaqin joyda quriladi.
Ta’kidlanishicha, Sherobod I loyihasini amalga oshirish uchun ayni paytda ushbu loyiha uchun tender o‘tkazilmoqda. Takliflar so‘rovi 2020-yil 14-dekabrda boshlangan va 2021-yil 15-martgacha davom etadi. Birinchi bosqich doirasida kamida 200 MVt quvvatga ega fotoelektr stansiyasini va yangi infratuzilmani qurish rejalashtirilgan.
Yillik ishlab chiqarish 1,1 milliard kVt/soatdan ortiq bo‘lgan 500 MVt quvvatga ega 2 ta FES hududdagi yillik elektr energiyasi iste’molining, taxminan, 30 foizini ta’minlash imkoniyatiga ega bo‘ladi.
Sherobod II loyihasi doirasida ochiq tender o‘tkaziladi va bu 2021-yil boshida rasman e’lon qilinadi.
“Osiyo taraqqiyot bankining texnik xizmatlari loyihani amalga oshirishda shaffoflik va ochiqlik, loyiha bo‘yicha xatarlarning oqilona taqsimlanishi, yakuniy xizmatdan foydalanish hamda narx va sifatning umumiy mutanosibligi tamoyillariga rioya qilgan holda ilg‘or dunyo yondashuvlaridan foydalanishga qaratilgan”, — deyiladi xabarda.
Avvalroq O‘zbekiston 2030-yilga qadar qayta tiklanadigan energiya manbalari ulushini 25 foizgacha oshirishi mumkinligi to‘g‘risida xabar berilgandi.
Izoh (0)