Germaniyalik uchuvchi Semmi Kramer koronavirusga qarshi ommaviy vaksinatsiya boshlangani munosabati bilan samolyot yordamida osmonda shprits shaklini tasvirladi, deb xabar beradi Reuters.
Parvoz o‘tgan haftada amalga oshirilgan. Osmonda shprits shaklini “chizish” uchun 20 yoshli uchuvchi 200 kilometr masofani bosib o‘tgan, “shprits”ning uzunligi 70 kilometrni tashkil etadi.
Kramerning aytishicha, bu kabi marshrutni u GPS qurilma yordamida rejalashtirgan. Uchuvchi o‘zining aksiyasini emlanishga da’vat sifatida qabul qilmasliklarini so‘ragan, u faqatgina tez orada vaksinatsiya boshlanishini eslatib qo‘yishni va odamlarni bu borada o‘ylashga chaqirmoqchi bo‘lgan. “Balki, bu shunchaki xursandchilikdandir, chunki aviatsiya sohasi pandemiyadan jiddiy zarar ko‘rdi”, — deya qo‘shimcha qiladi Kramer.
Germaniya va boshqa Yervopa mamlakatlarida ommaviy vaksinatsiya 27-dekabr kuni boshlandi. Yevropaliklar Pfizer va BioNTech hamkorligida yaratilgan vaksina bilan ixtiyoriy va bepul emlanishi mumkin. Germaniyada emlash dastlab keksa fuqarolardan boshlanadi.
Izoh (0)