Sling Pilot akademiyasining uchuvchilari Kaliforniyadagi mashg‘ulot zonasida o‘tkazilgan sinov parvozlari vaqtida noma’lum uchar jismga duch keldi. The Drive mualliflari mazkur holatga oydinlik kiritish maqsadida guvohlar bilan bog‘langan.
Ushbu noodatiy hodisada ishtirok etgan uchuvchilardan birining so‘zlariga ko‘ra, ular akademiyadan Santa-Katalina oroliga qarab standart marshrut bo‘yicha harakatlanayotgan bo‘lgan. Parvoz vaqtida ular havodagi noodatiy obyektga duch kelgan. U reaktiv kiyim kiyib olgan yigitga o‘xshash bo‘lib, taxminan 1 kilometr balandlikka ko‘tarilgach samolyotning o‘ng tomonidan uchib o‘tgan va ko‘zdan yo‘qolgunga qadar parvozni davom ettirgan.
Mazkur obyekt bilan aloqa o‘rnatishning imkoni bo‘lmagan. Mashg‘ulot zonasida foydalaniladigan radiokanal orqali u haqida hech kim ogohlantirmagan. Boshqa hech qanday ma’lumotlar bo‘lmagani sabab uchuvchilar rasmiy hisobotni taqdim etmagan. Biroq ular holat tasvirlangan videoni ijtimoiy tarmoqqa joylashtirgan.
https://www.instagram.com/p/CJHqWoeBiLr/
Reaktiv kiyim yordamida okean uzra parvoz qilayotgan yigit 3000 fut balandlikka ko‘tarilgan. Hozirda juda kam masofaga parvoz qilishga qodir reaktiv kiyimlar mavjud, shuningdek, ular parvoz uchun jihozlanmagan, ayniqsa, bu kabi balandlikda ucha olmaydi.
Taxminlarga ko‘ra, videoda reaktiv kiyimdagi biror dron-maneken tasvirlangan bo‘lishi mumkin. Shunda bir savol yuzaga keladi: Buni amalga oshirish kimga kerak? Bundan tashqari, bu kabi tryukni bajarish arzonga tushmaydi. Ushbu holatda apparat aholi punkti ustidan ham uchib o‘tmagan, u dengiz ustida bo‘lgan, shu sabab parvoz holatini nazorat qilish yanada qiyinchilik tug‘dirgan bo‘lishi kerak.
Eslatib o‘tamiz, 2020-yilning sentabr oyida American Airlines uchuvchisi Los-Anjelesga qo‘nishni amalga oshirish vaqtida reaktiv kiyimdagi noma’lum erkakka duch kelganini so‘zlab bergandi.
Izoh (0)