Andijon viloyati “Yagona buyurtmachi xizmati” injiniring kompaniyasi rahbari Muhiddin Qodirov o‘ziga tegishli bo‘lgan Milano Biznes Servis MChJga qariyb 20 milliard so‘mlik qurilishga oid davlat buyurtmalarini olgani haqida xabar berilgandi.
Unda viloyatdagi mukammal ta’mirlash va rekonstruksiya ishlarini amalga oshirish uchun o‘tkazilgan tanlov va tenderlarda shaffoflik ta’minlanmaganligi bayon etilgan.
Andijon viloyati prokuraturasining ma’lum qilishicha, holatlar viloyat prokuraturasi tomonidan tegishli soha mutaxassislari ishtirokida o‘rganilmoqda. O‘rganish natijasi bo‘yicha qo‘shimcha xabar berilishi bildirilgan.
Avvalroq Jizzax viloyat hokimi Ergash Soliyevning qiziga tegishli kompaniya 2 milliard so‘mlik loyihalarni qo‘lga kiritgani, Korrupsiyaga qarshi kurashish agentligi bu borada o‘rganishlar o‘tkazib, natijalari bo‘yicha OAV va keng jamoatchilikka batafsil ma’lumot berilishini bildirgani haqida xabar berilgandi. Keyinchalik Jizzax viloyati hokimining qiziga tegishli kompaniya 1,9 milliard so‘mlik yana bir tenderni yutib olgani ma’lum bo‘ldi.
Shuningdek, Jizzax viloyati hokimining sanoatni rivojlantirish, kapital qurilish, kommunikatsiyalar, kommunal xo‘jalik masalalari bo‘yicha o‘rinbosari Rahmonqulov Akram Bahriddinovichning qarindoshlari ijtimoiy va boshqa soha obyektlarini qurish bo‘yicha bir necha yuz milliard so‘mlik davlat buyurtmalarini qo‘lga kiritgani aniqlandi.
Bundan tashqari, Xorazmda mansabdorlar o‘nlab obyektlarni tendersiz berib yuborgani aniqlandi. Ularning boshqa jinoyatlari bo‘yicha ham tergov boshlandi.
Izoh (0)