Toshkent viloyati yuqumli kasalliklar shifoxonasi bosh shifokori Guljahon Yo‘ldosheva ishi bo‘yicha navbatdagi sud majlisi bo‘lib o‘tdi. “Kun.uz”ning xabar berishicha, bu galgi sud majlisida Toshkent viloyati ruhiy-asab kasalliklari dispanseri bosh shifokori va dispanserning boshqa xodimlari marhum Farrux Rustamovning kasalxonaga ko‘chirilishi bilan bog‘liq holatlar bo‘yicha ko‘rsatma berdi.
Toshkent viloyati ruhiy-asab kasalliklari dispanseri bosh shifokori Feruza Shonosirova marhum Farrux Rustamovni shifoxonaga qabul qilgani va bunga e’tiroz bildirmaganini ta’kidlagan.
Feruza Shonosirova bemorni dispanserga Toshkent viloyati sog‘liqni saqlash boshqarmasi boshlig‘ining birinchi o‘rinbosari Nizom Abdullayevning topshirig‘i bilan qabul qilganini aytgan.
Shuningdek, karantin davrida Toshkent viloyati yuqumli kasalliklar shifoxonasida qorovul bo‘lib xizmat qilgan Farrux Ashirov marhum Farrux Rustamovni tez tibbiy yordam mashinasi olib ketishga kelganida Yo‘ldoshevaga telefon qilib xabar berishga urunganini, bemorni tez tibbiy yordam mashinasi olib chiqib ketayotgan vaqt Yo‘ldoshevaga qo‘ng‘iroq qilib tusha olmaganini bildirgan.
Bu ikki guvohdan tashqari, sud majlisida dispanserning yana 4 nafar vakili ko‘rsatma bergan. Qolgan guvohlarning ko‘rsatmalari keyingi sud majlisiga qoldirilgan.
Ma’lumot uchun, viloyat SSB boshlig‘ining birinchi o‘rinbosari Nizom Abdullayev sentabr oyida “Qalampir.uz”ga bergan intervyusida bemorni infeksion kasalxonadan ruhiy dispanserga ko‘chirish “Guljahon Yo‘ldoshevaning xatosi” bo‘lganini aytgan edi.
Avvalgi sud majlislarida Guljahon Yo‘ldoshevaning o‘zi marhumning o‘limiga aloqasi yo‘qligini ta’kidladi. Uning bu gaplarini shifoxona infeksionisti Sheyxnazar Ro‘zmetov tasdiqladi.
Karantin davrida infeksion shifoxonada hamshira bo‘lib ishlagan Aydana Yesenaliyevaning aytishicha, u Yo‘ldoshevaning marhum Farrux Rustamovni boshqa shifoxonaga ko‘chirish haqidagi gapini “eshitib qolgan”. Yo‘ldosheva bu gapni aytmaganini, Yesenaliyevaning ko‘rsatmasi yolg‘onligini bildirgan. Shifokor bu gapni qachon, qayerda, qaysi tilda va kimlarning oldida aytgani haqida advokat bergan savollarga hamshira aniq javob bera olmagan.
Eslatib o‘tamiz, koronavirusga chalingan bemor o‘limi va 250 million so‘m budjet mablag‘larini talon-toroj qilganlikda ayblanib, qamoqqa olingan Toshkent viloyati bosh infeksionisti Guljahon Yo‘ldoshevaga nisbatan jinoyat ishi 2020-yil 11-avgustda Chirchiq shahar prokuraturasi tomonidan qo‘zg‘atilgan. 8-sentabrga kelib, ehtiyot chorasi sifatida ayblanuvchi qamoqqa olingan edi.
Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari, xususan, Senat raisi Tanzila Norboyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasini o‘zgartirishga chaqirgan. Shundan so‘ng Guljahon Yo‘ldosheva 6-oktabr kuni uy qamog‘iga o‘tkazilgandi.
Guljahon Yo‘ldosheva va boshqalarga nisbatan sud jarayonlari 27-noyabr kuni boshlangan.
Izoh (0)