Prezident Shavkat Mirziyoyev 25-dekabr, juma kuni bo‘lib o‘tadigan O‘zbekiston yoshlari forumida ishtirok etadi. Bu haqda Prezident matbuot xizmati xabar berdi.
O‘zbekiston tarixida ilk marta o‘tkazilayotgan ushbu yirik tadbirni tashkil etish tashabbusi davlat rahbari tomonidan 2020-yil 20-noyabr kuni ilgari surilgan edi.
18-dekabr kuni Toshkent shahrida boshlangan forum tadbirlari yanada keng ko‘lam kasb etib, mamlakatning barcha shahar va tumanlarida bo‘lib o‘tdi. Yoshlar vazir va hokimlar bilan ochiq muloqot qilish, hokimiyat va boshqaruv organlarining boshqa vakillari bilan uchrashish, yetakchi ekspert va jamoatchilik faollari bilan muhokamalarda ishtirok etish imkoniyatiga ega bo‘ldi.
“Bugungi tadbir O‘zbekiston yoshlari forumining mantiqiy yakuni bo‘ladi”, deyiladi xabarda.
Ta’kidlanishicha, Prezident forumda nutq so‘zlaydi va yoshlar bilan muloqot qiladi. Tadbirning o‘zida 3 ming 300 nafardan ziyod, shuningdek, hududlardagi studiyalarda 26 ming nafar yigit-qiz qatnashishi kutilmoqda.
Izoh (0)