Ijtimoiy tarmoqlarda 24-dekabr kuni ichki ishlar xodimlari bir fuqaroning qo‘liga kishan solgan holda olib ketayotgani aks etgan video tarqaldi, video izohlarida mazkur fuqaro Denov shahri IIB boshlig‘ining ustidan shikoyat qilgani uchun olib ketilgani aytigan. O‘zbekiston Ichki ishlar vazirligi axborot xizmati mazkur video bo‘yicha ma’lumot berdi.
Surxondaryo viloyati IIB ma’lumotiga ko‘ra, Denov shahridagi O‘zbekiston ko‘chasida yashovchi fuqaro I.A. 2019-yilning noyabr oyida o‘ziga tegishli bo‘lmagan, “Namuna” mahallasida joylashgan 4 sotix yer maydonini aldov yo‘li bilan fuqaro A.A.ga 45 million so‘mga sotib, pullarini o‘zlashtirib yuborgan. Fuqaro I.A. o‘zining jinoiy harakatlarini davom ettirib, ushbu yer maydonini 2020-yilning iyun oyida fuqaro V.X.ga ham 49 million so‘mga sotgan.
Ushbu harakatlarida O‘zbekiston Respublikasi Jinoyat kodeksining 168-moddasi 3-qismi “b” bandida (takroran yoki xavfli retsidivist tomonidan sodir etilgan firibgarlik) ko‘rsatilgan firibgarlik jinoyatini qasddan sodir etish alomatlari yuzasidan I.A.ga nisbatan Surxondaryo viloyati IIB tomonidan jinoyat ishi qo‘zg‘atilib tergov harakatlari olib borilgan.
Vazirlik xabariga ko‘ra, gumon qilinuvchi I.A. bir necha marta rasmiy ravishda tergovga chaqirtirilgan. Fuqaro ichki ishlar organlari xodimlarining qonuniy talablarini bajarishdan bosh tortganligi sababli viloyat IIB tergov boshqarmasining 2020-yil 24-dekabrdagi “Majburiy keltirish” qaroriga asosan, gumonlanuvchi I.A. Denov tumani ichki ishlar organlari xodimlari tomonidan majburiy tartibda tergovga olib kelinishi ta’minlangan.
IIV tomonidan bildirilishicha, videoyozuvda fuqaro I.A.ning Denov tumani ichki ishlar organlari xodimlari tomonidan majburiy tartibda tergovga olib kelinishi holati tasvirlangan.
“Shuningdek, hozirda ichki ishlar organlari xodimlarining qonuniy harakatlariga to‘sqinlik qilib, ularning xizmat vazifalarini bajarishlari bilan bog‘liq qonuniy talablarini bajarmaslikka omma oldida da’vatlar qilgan hamda xodimlarni obro‘sizlantirishga qaratilgan harakatlarni amalga oshirgan fuqarolarni aniqlash va qonuniy chora ko‘rish ishlari amalga oshirilmoqda”, — deyiladi Ichki ishlar vazirligi xabarida.
Izoh (0)