Gana Respublikasi fuqarolari — Emmanuel Akvey hamda Sussanna Mfumlarning Andijon shahrida tug‘ilgan farzandlariga tug‘ilganlik haqidagi guvohnomalar berildi. Bu haqda “Daryo” muxbiri Umidjon Mamarasulov xabar berdi.
DXA Andijon viloyat boshqarmasi axborot xizmatining ma’lumot berishicha, 2020-yil 23-dekabr kuni Andijon shahar fuqarolik holatlari dalolatnomalarini yozish bo‘limiga Gana Respublikasi fuqarolari — Emmanuel Akvey hamda Sussanna Mfumlar viloyat perinatal markazida tug‘ilgan farzandlariga guvohnoma so‘rab, murojaat qilgan.
Ularning murojaati FHDYo bo‘limi tomonidan tegishli tartibda ko‘rib chiqilib, bolalarning haqiqatan ham Andijon shahrida tug‘ilganligi tasdiqlangach, dalolatnoma yozuvlari qayd etilgan.
24-dekabr kuni DXA Andijon viloyat boshqarmasi boshlig‘i Mahmudjon Abdijaliyev tomonidan xorijlik fuqarolarning Marven va Arven ismli o‘g‘illariga tug‘ilganlik haqidagi guvohnomalari topshirilgan.
“O‘zbekistonga 2020-yilning mart oylarida oilam bilan kelgandik. AQShlik ko‘ngillilar orasida o‘zbekistonlik o‘quvchilarga ingliz tilini o‘rgatishni maqsad qilgandik. Ayni paytda Andijon shahridagi 43-umumiy o‘rta ta’lim maktabida o‘quvchilarga ingliz tilidan saboq beryapmiz. Shu kunga qadar o‘nlab o‘quvchilarimiz chet tilini bilishini tasdiqlovchi sertifikatlarga ega bo‘ldi. Joriy yilning 28-sentabr kuni turmush o‘rtog‘im Susanna farzandlarimizni dunyoga keltirdi. Bugun ularning tug‘ilganligi qayd etilganidan xursandmiz. Boisi yurtimizga qaytganimizda ularni ro‘yxatga olishda qiyinchiliklar vujudga kelmaydi. Ishimiz oson hal bo‘lganidan xursandmiz”, — deydi Emmanuel Akvey.
Andijon shahar FHDYo bo‘limi mudirasi Dilyoraxon Karimovaning qo‘shimcha qilishicha, 2020-yilning 27-noyabr kuni Moldova Respublikasi fuqarolari Nikolay Sarbon va Anastasiya Preidalarning 2020-yil 15-fevral kuni Andijon shahrida tug‘ilgan farzandi Vasiliy Preidaning ham tug‘ilganligi bo‘limda qayd etilgan.
Izoh (0)