Kosonda ikki oila o‘rtasida yuz bergan janjal o‘g‘lini himoya qilgan otaning o‘limiga sabab bo‘ldi

Qashqadaryo viloyati Koson tumanida ikki oila erkaklari o‘rtasida yuz bergan janjal ulardan birining boshlig‘i o‘limiga olib keldi. Bu haqda Ichki ishlar vazirligi huzuridagi Tergov departamenti xabar berdi.

Qashqadaryo viloyati Koson tumani “Paxtazor” MFYda joylashgan oziq-ovqat mahsulotlari bozorchasi yonida 2020-yilning 22-noyabr kuni soat 16:00 da Husniddin R. 24 yoshli Mirolim B.ni ko‘rib qolib, o‘rtalarida bo‘lgan o‘zaro adovat sababli undan qasd olish maqsadida ushbu janjalga akalari — 22 yoshli Ruxiddin R., Ozodbek R. va boshqalarni jalb qilgan.

Bundan xabar topgan Mirolim B. o‘zining yaqin qarindoshlarini yordamga chaqirgan. Mirolim B.ga biron-bir ziyon yetmasligi uchun hodisa joyiga yetib kelgan otasi, 57 yoshli Mahmud M., 27 yoshli akasi Mirjalol B. va pochchasi 35 yoshli Jamshid M. ushbu janjalning oldini olib, bartaraf qilmoqchi bo‘lgan.

Biroq Husniddin R., Ruxiddin R., Ozodbek R. va boshqalar bir guruh bo‘lib, sovuq qurol sifatida foydalanish mumkin bo‘lgan ashyolarni ishlatib, Mirolim B.ni himoya qilib, janjalning oldini olmoqchi bo‘lgan fuqaro Mahmud M., shuningdek, uning o‘g‘illari Mirjalol B., Mirolim B. va Jamshid M.ning turli joylariga qasddan urib, turli darajada tan jarohatlari yetkazgan.

Oqibatda Mahmud M., Mirjalol B., Mirolim B. va Jamshid M. turli darajadagi tan jarohatlari bilan Koson tumani tibbiyot birlashmasiga murojaat qilgan. Shifoxonada ko‘rsatilgan tibbiy muolajalarga qaramasdan, fuqaro Mahmud M. olgan tan jarohati sababli 11-dekabr kuni vafot etgan.

Dastlab mazkur holat yuzasidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan.

Dastlabki tergov jarayonida 8-dekabr kuni Husniddin R., Ozodbek R., va Ruxiddin R.ga nisbatan Jinoyat kodeksining 104-moddasi 2-qismi “b”, “k”, “l” bandlari (bir guruh bo‘lib, sovuq qurol sifatida foydalanish mumkin bo‘lgan ashyolarni ishlatib, o‘z xizmat yoki fuqarolik burchini bajarib, yaqin qarindoshi bo‘lgan shaxsga nisbatan qasddan badanga og‘ir shikast yetkazish) bilan ayblov e’lon qilinib, Husniddin R., Ozodbek R.ga nisbatan qamoqqa olish tarzidagi, fuqaro Ruxiddin R.ga nisbatan esa garov ehtiyot chorasi qo‘llanilgan.

Fuqaro Mahmud M. olgan tan jarohati sababli 11-dekabr kuni vafot etgach, jinoyat ishi Jinoyat kodeksining 104-moddasi 2-qismi “b”, “k”, “l” bandlaridan 104-moddaning 3-qismi “d” bandiga (jabrlanuvchining o‘limiga sabab bo‘lgan qasddan badanga og‘ir shikast yetkazish) qayta malakalangan. Hozirda jinoyat ishi bo‘yicha tergov harakatlari davom ettirilmoqda.